Kuminah TB vei mi 1087 hmuhchhuak tawh

Aizawl | June 25, 2026: National Health Mission (NHM) Mission Director Dr R Lalchhuanawma.kaihhruaina in vawiin chhun khan State TB Forum Meeting Mission Director Office chamber-ah neih a ni.

Mission Director, NHM chuan Meeting neih chhan sawifiahin memberte chibai a buk a, member te hnenah lawmthu a sawi bawk. Mizoram-a TB natna veitu an pun zel loh nan leh TB umbo anih theihnana thahnemngai leh rim taka thawktu National Tuberculosis Elimination Programme (NTEP)-a thawktu State TB Officer leh a naute chungah lawmthu a sawi a. TB natna umbo a nih zel theihnana theihtawp chhuaha taima taka thawk zel turin a chah bawk.  

Dr. Zochhuanawmi, Jt. Director (TB) & State TB Officer chuan Powerpoint presentation hmangin hnathawh dan hrang hrang a sawifiah a. Hetiang hian January - June 2026 chhunga TB report tlangpui a tarlang ;-

1. TB rinhlelh test zat - 61246

2. TB damlo hmuhchhuah zat - 1087

3. Kum 14 hnuai lam TB vei zat - 68 (6.5%)

4. Kum 14 chunglam TB vei zat 977 (93.5%)

5. Mipa TB vei zat - 600 (57%)

6. Hmeichhia TB vei zat - 445 (43%)

7. MDR - TB hmuhchhuah zat - 47

8. Chuap TB vei zat - 520 (49%)

9. Chuap pawn lam TB vei zat - 538 (51%)

10. TB-HIV vei kawp hmuhchhuah zat - 92

11. TB vanga thi - 71

12. TB tihdam zat - 86.49%

TB damlo chhawmdawlna programme Pradhan Mantri TB Mukt Bharat Abhiyaan - Nikshay Mitra Initiative kalpui mek a nih thu a sawi a. Hemi atan hian  Minister, MLA leh Sawrkar Official ten  Food Basket hmanga TB damlo \anpui mek 103 an awm thu leh TB damlo Food Basket dawng mek zat 374 an awm thu a sawi. TB natna vei inenkawl zinga 28% vel chiahin Donor an neih a, Donor neih belh zel an duh thu a tarlang bawk. 

He meetingah hian TB umbona atana campaign kal mek TB Mukt Bharat 100 Days campaign ah khua leh veng ah screening runpui neih thin a ni a. Heta inentir tam ber hi kum 50 chunglam an ni a. TB vei hi kum 15 leh kum 45 inkar 6an tam ber avang hian heng screening neihah kum valai zawk te an kal tha lo thin chu harsatna lian tak a ni tih sawi lan a ni a. College zirlai te, office a thawk kum valai te, kum 15 leh 45 inkar hrim hrim te chu a tam thei ang ber screen an nih theih nan hmalak a ngaih thu tarlan a ni.

TB damlo hospital admit mahmawh te tan Sawrkar hospital ah ICU khum 1 leh general ward a khum 5 te hauhsak an nih theihna turin hmalak ni se an ti a. 

TB damlo chaw tha hmanga chhawmdawltu Donor zawn kawngah hmalakna tur hrang hrang te sawiho ani bawk.

Meetingah hian Dr. Lily Chhakchhuak, Director of Health Services, Dr. Catherine Ngurbiakveli, Addl. Director, DHME, Pu PC. Lalngaizuala, Jt. Director, School Education Department te bakah MSACS, ICT Dept., ZMC aiawh leh NHM Official engemaw zat telin TB Survivor sawm bik thahnem tak an tel bawk.