Central YMA-in lehkha pawimawh leh Baptisma Certificate pek chhuah fimkhur turin Kohhran hruaitute ngen

Aizawl | June 2, 2026: Central YMA Office-ah Central YMA OB te leh Mizoram Kohhran Hruaitute Committee (MKHC) hruaitute tukin khan an inkawm a, inkawmhona hi Cenral YMA President R Lalngheta'n a kaihruai.

Inkawmhonaah hian YMA in Ruihhlo Do kum a puan mekah Kohhran nena tan lakho dan tur sawiho a ni a. Kohhran hrang hrang ten Ruihhlo leh a kaihhnawih do kawngah theihtawp chhuahin hma an la mek hlawm a, ruihhlo in kan thalaite nun leh chhungkua a khawih nasat avangin tuna hma lakna theuh bakah uar leh zuala hmalak a tul thu sawiho a ni. Hemi pual hian Kohhran tinah thupui pakhat hmanga tawngtairual buatsaih turin Central YMA hruaitute hian an ngen.

Kohhran tin ten lehkha pawimawh leh Baptisma Certificate an pek chhuah thinah fimkhur zawka kal pui a tul thu sawi ho a ni a, a bikin khua leh tui ni lote hnenah pek fimkhur turin Central YMA hruaitute hian an ngen bawk.

Nikuma YMA Inkhawmpui Lianin a rel angin, “Zohnahthlak chi peng hrang hrang Mizoram a chengte zingah chi bil hmalakna a awm tawh loh nan Central YMA in hma la rawh se,” tih chungchangah Central YMA hruaitute chuan Kohhran tin te hnenah chibil zawnga hma la lo tura ngenna a lo siam tawh angin chibil hmalakna a reh theihna tura theihtawp chhuah pui turin an ngen bawk.

Inkawmnaah hian MKHC atangin Chairman, Rev John Raldosanga, Synod Moderator leh Office Bearer dang mi 6 an tel a, Central YMA atangin President leh a thawhpuite an tel.