Transport Minister hova Deptt lam nen sawiho hma chu 'Mizo Taxi' hman tum lo; STA thupek sut turin Transport minister an ngen!

Aizawl | June 2, 2026: Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Ownera Association (ADAROA) te chuan, vawiin khan Mizoram Sorkarin July 1 aṭanga Mizo Taxi app hmang tura a tih chungchangah Transport minister Vanlalhlana chu a Pisa-ah an hmu.

State Transport Authority (STA) in Mizo Taxi hman tir a tum dan hi an pawm thei lova, he thupek hi sut leh turin an ngen a.

Heng pawlte hian, "Ṭha taka min lo dawngsawngin, Department Official te nen ama hova sawihona hun min siam thuai tur thu min hrilhin, tha tak in kan inkawm thei a ni," an ti a.

"Sawi hona neih a nih hma chu, he application hi download leh Registration lo ti lo turin, kan member te pawh kan in hriattir, " tiin heng pawl te hian thuchhuah siamin an tarlang.

Mizo Taxi app in a nghawng tur pawlte hian, he application hman an duh loh chhan te ziakin Minister hnenah hian an thlen a. He hunah. hian, MTA OB panga, ATTA OB panga leh ADAROA OB paruk an kal a ni.

Transport minister hnenah hian, May 29, 2026-a State Transport Authority (STA) Secretary in, Ni 01.06.2026 atanga Four-Wheeler Taxi, Two-Wheeler Taxi leh Auto-rickshaw te Mizotaxi Mobile Application hmang vek tura Office Order a rawn chhuah hian min barakhaih hle a, he Application chungchanga inrawnna leh sawihona mumal pawh awm lova, hmang vek tura Order a rawn chhuak ta mai hi, keini pawl pathum te chuan kan hrethiam lovin, STA in he Application min hman tir a tum dan hi kan pawm thei lova, he Order hi min cancel sak leh turin kan ngen a che," tiin ziakin an thlen a.

Mizo Taxi Mobile Application hman an duhlohna chhan an tarlante:

I) Application man chawi ngai lo a hman theih a awm lai a, hman man kum tin chawi a ngai tur hi tha kan ti lo a ni.

2) Mipui ten he Application an hman man, chhiah an chawi te a ngai tur hi tha kan ti lo.

3) STA Rate kan hman mek hi, keini (Mizoram Taxi Association, Aizawl Two Wheeler Taxi Association leh Aizawl District Auto Rickshaw Owners Association) te nen ennawn leh siam that phawt a nih loh chuan he Application hi hman chi ah kan ngai lo.

4) Tunlai khawvel thil man sang zelah, thil dang man ti hniam tura hmalakna awm si lova, Taxi leh Auto-rickshaw a eizawngte chungah hetianga ruahmanna siam sak kan ni hi kan hrethiam thei to a ni.

5) He Application hmang tura pawimawh ber, Internet Network kan la neih that tawk loh avangin, lirtheia eizawng leh mipuite tan harsatna thlentu tur niin kan hria a ni.

Vawiin Dt 2.6.2026 hian Mizoram Sorkar in Dt 1.7.2026 a tanga Mizotaxi Mobile Application hmang tur a min tih chungchangah, he application hma kan duh loh chhan te Pu Vanlalhlana Transport Minister hnenah ziakin lehkha thehluh a ni a, tha takin min lo dawngsawng a, Department Official te nen a ma hi a sawihona hun min siam thuai tur thu min hrilhin, tha tak in kan inkawm thei a ni. Sawi hona neih a nih hma chu, he application hi lo download leh Registration lo ti lo turin, kan member te pawh kan in hriattir a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]