Tihluihnaa nawhchizawrhtir Mizo hmeichhiate Mizoram Police-in chhanchhuak!

Aizawl | May 8, 2026: Tihluihnaa state danga nawhchizawrhtir Mizo hmeichhia te Mizoram Police-in an chhanchhuak a, he thila mawhphurtute man an ni bawk.

AI Generated Image

All Women Police Station, Aizawl-in tun thla ni 1 khan Mizo hmeichhe pakhat hnen atangin FIR an dawng a, FIR-a a ziah danin - amah leh a thiannuin Rudrapur, Uttarakhand-a Beauty Queen Salon & Spa-ah thla khata Rs. 20,000 hlawha thawhna tur awm nia sawi chu October 2025 khan an pan a. A hmun an thlen hnuah hlawh an hmuh theihna tur chuan mipat hmeichhiatna (extra services) an tih tel ngei a tul thu hrilh an nih bakah ni khatah dawrtu mi pathum atanga pakua neih luihtir an ni.

Dawrtu tur an neih dawnin an duh lo chung zu leh ruihhlo chi hrang hranga hrai ruih thin an nih thu pawh FIR ah chuan tarlan niin, heti chung hian an hlawh tur ang pek an ni ngai lova, an tlan chhuah theih lohna tura kalhhnan an ni bawk.

Heng hmeichhia te hian April ni 4, 2026 khan an awmna hmun kalhna chu chhu chhiain an tlanchhuak a, thla hmasa vek, April 7 khan Aizawl thlengin FIR an thehlut ta nia thudawn a ni.

Hemi chungchangah hian All Women Police Station chuan hma la zui nghalin, Special Investigation Team (SIT) dinin, Mizo hmeichhe dang pawh he hmuna la tang an awm tih hriat zui a ni a. Mizoram Police leh Women and Child Development Department hnuaia thawktu ten tun thla ni 4 khan Uttarakhand panin, a tuk ni 5 ah Rudrapur Police-te nen Mizo hmeichhiate thawhna hmun Beauty Salon & Spa chu luhchhuahin, Mizo hmeichhe 5 la hren beh te chhanchhuah an nih thu leh an zingah kumtlinglo 2 an tel thu Police te chuan an sawi.

Rudrapur Police Station-ah thubuai dang ziahlut leh a nih thu leh he thila inhnamhnawih mi 6 man zui an nih thu Special investigation team chuan an sawi a. Mi 6 man zingah hian a bultumtu leh Spa neitu ni bawk, hnam dang leh a kawppui Mizo hmeichhia bakah a laizawnnu pawh an tel niin an sawi bawk.

- ZabillianZ

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]