Kum 22 mi, Ruth Khawlhring lehkhabu pasarihna 'Isua Nen' tlangzarh

"Isua nen' tih hi - Mizo, a pui apang, a lian a te, nula leh thlangval leh, naupang thanglai te atanga tar thleng pawhin zirtir awm lehkhabu tha tak a ni,"- Prof Rualkhuma Colney

"A hmaa sap tawnga lehkhabu ka ziah thin chhan chu - ka target audience chu sap an ni. Tuna ka lehkhabu ziah hi chu, ka thalaipui - Mizote ngeiin chhiar se ka duh avangin Mizo tawng ngeia ziak ka ni," - Ruth Khawlhring

Aizawl | May 16, 2026: Nula kum 22 mi, Ruth Khawlhring lehkhabu pasarihna 'Isua Nen' tih chu vawiin chawhnu dar 1:00 khan an chenna in, Tuikual North, Aizawl-ah Prof Rualkhuma Colney-in a tlangzarh.

'Isua Nen' hi phek 140 niin, cheng 150 man a ni a, testimony leh short dahkhawmna a ni a, a ziaktu leh Isua inkar thu tam tak hmuh tur a awm a. Lehkhabuk leh Wheeling Books-ah lei tur a awm dawn bawk a ni.

Ruth Khawlhring hian Jengkha-a rawngbawlna atanga a ziah, 'Jengkha Diary' a lo tichhuak tawh a, tunah hian, 'Isua Nen' a tichhuak leh a, hun rei lote-ah hian, 'Isua Nen' tiin mahni inphatin, Voluntary Missionary-in a chhuak dawn a ni.

Tlangzarhtu Prof Rualkhuma Colney chuan, "Isua nen' tih hi - Mizo, a pui apang, a lian a te, nula leh thlangval leh, naupang thanglai te atanga tar thleng pawhin zirtir awm lehkhabu tha tak a ni,"a ti a.

Ruth Khawlhring chuan, a lehkha tam zawk Sap tawnga a ziah thin chhan chu chhiartu tura a beiseite vang an nih thu a sawi a. "A hmaa sap tawnga lehkhabu ka ziah thin chhan chu - ka target audience chu sap an ni a, online in thil ka ziak thin a, khatah khan Sapho te, vai pawh an ni ang, hnam dang hrim hrim English a chhiar thin kha an awm a, kha vanga English-a ziak thin kha ka ni a, Mahse, tuna ka lehkhabu ziah hi chu, sapho chhiar tura ka tih a ni lova, vai chhiar tura ka tih pawh a ni lova, ka thalaipui - Mizote ngeiin chhiar se ka duh avangin Mizo tawng ngeia ziak ka ni," a ti.

Heti hian, Ruth Khawlhring hian Lehkhabu pasarih - Novel 4, Poem 1, Diary 1 leh Pathiantu 1 a tichhuak tawh a ni.

1. 2022: pawl 12 a zirlaiin, 'The Trouble Maker' a tichhuak a.

2. 2023 khan HSSLC (Arts) 2023 Mount Carmel School, atanga pass in 6-na a ni a, a novel pahnihna 'Shallow' a tichhuak.

3. Feb 13, 2024 khan 'Ignoria' a tlangzarh, Shallow chhunzawmna a ni.

4. Jengkha Diary - Jengkha-a rawngbawlna diary a ni a, Mizo a a ziah hmasa ber a ni.

5. Kum 2025 khan, Kum 21 mi niin, 'Akrasia' chu Feb 17, 2025 khan a tichhuak. He lehkhabu hi a lehkhabu pangana niin, peorty dahkhawmna niin, english a ziah a ni a, phek 127 a ni a, poetry 127 a awm.

6. Kum 2025 Dec 12 khan, a lehkhabu parukna 'The Prisoner' a tlangzarh - The Prisoner-ah hian depression, mental illness, emotional trauma, leh feminism kan hmu a. Psychological fiction niin, a changtunu Ruby Kilgore hmang hian hmeichhia mental illness nei ten khawvel an hmachhawn dan kan hmu a ni.

7. May 16, 2026 - 'Isua Nen'

Ruth Khawlhring hi Dr Lalchhuanmawii leh Dr Lalhmachhuana, Tuikual North te fa pathum zinga milai, hmeichhe awm chhun a ni a. December 8, 2003-ah piangin, Pachhunga University College (PUC) a BA English 6th Semester zirlai niin, kum 2024 - 2025 chhung PUC SU niin, Asst. Cultural Secretary nihna a lo chelh tawh.

Ziak mite chawimawi na award hi a dawng ve nual tawh a. February 2026 a hman 11th International Literary Carnival, Kolkata-ah Women Writer award leh Dickens Award for Literary Excellence a dawng a, award ceremony hi Gala Networking Dinner in a chhunzawm bawk dawn a ni.

Feb 2026 tho a hman Bangalore a Literary Honours Award semna-ah Best Reflective Novel Award a dawng bawk a ni.