"Nikumah inzir chawpin hma kan la a, harsatna tam tak kan tawk nain kan pek chhuah tur Support Price zawng zawng kan pe chhuak thei,"

Samthang | May 16, 2026: Chief Minister Lalduhoma chuan vawiin khan Samthang Community Hall-ah khawtlang mipuite buatsaih Sawhthing Kut a hmanpui a, Sawhthing hi kan ram leilung tichhe tam lo zawng leh a hralhna lama kan lo hlawkpui zawk theih nan Organic kan uar a tul a. A processing kan kalpui a tul bawk a. Kan inbuatsaih chho zel, a ti.

Samthang sawhthing kutah hian Dr KC Lalmalsawmzauva chu khualzahawm a ni.

Thusawiin Chief Minister chuan, Ka politics zin kawng leh sawhthing market hian inanna tak a nei a, a kawng a bum boh a. Mahse, Pathian hun ruat lo thleng hi tu ma dan rual a ni lo. Nikumah inzir chawpin hma kan la a, harsatna tam tak kan tawk nain kan pek chhuah tur Support Price zawng zawng kan pe chhuak thei.

Kuminah pawh a tir lamah a rate hi a tha mai lo va. Kan hun tiam thlen hmaa a rate hniama lo hralh ta mai khua an lo awm bawk a. Nimahsela, Pathian zarah kan tum ang ngeiin kan hun tiam atangin kan lei tan leh a ni. Tunah phei chuan kan beisei phak bakin sawhthing rate a rawn sang ta a. Hei hi kan tih a ni lo va engkim chunga roreltu Pathian hnathawh a ni tih kan hria a ni.

Mizoram sawhthing hi a quality a tha a, damdawi anga hman theih a ni a, essential oil a ngah a, fibre a nei tlem si a, Ministry of DoNER-ah Unique Selling Proposition (USP) min kalpui turin kan dil a. Min rawn phalsak ta a.

USP - Sustainable Cultivation & Value Chain Management Project kan siam a. Project Cost hi Rs. 190 Crore vel a ni a. A processing Unit dinna tur bik atan Rs. 30.13. Crore kan ruahman a. Tun Nilaini liam ta khan a project hawnna hi online-in DoNER Minister nen kan nei a, a hawnna programme kan hman zawh rual hian Processing Unit kan dinna tur bik sum Rs. 30.13 Crore hi an rawn sanction nghal a ni. Hetiang taka pawisa sanction rang hi sawi tur a vang khawp mai.

Champhai district hi Sawhthing kan thar tamna district a nih angin Mualkawiah Processing Unit pui ber din a, a chawmtu tur a tenau deuh zawk pathum Tualcheng, Vaphai leh Zotlangah din kan rilruk a. He lai bial mipui zawng zawngten in chhawr phak vek dawn a ni.

Sawhthing market a that tial tial theih nan sawhthing hrisel kan thar a ngai a, kan ram leilung a tihchhiat nasat loh nan sustainable cultivation kan kalpui a ngai a. Chumi lam hawi zawnga kal hret hret a, engtikah emaw chuan Organic state-a inpuan kan duh a ni. A pulunga kan hralh ringawt hian bo thlau a tam thin a, a hlawk tawk lo va. A sawngbawlna hi hmun hrang hrangah neih chhoh zel kan tum, a ti.

Khaw taima, Sawhthing, fur Zikhlum leh Samtawk tharchhuak nasa in ni hi a chhuanawm ka ti a. Tam lehzual in tharchhuah zel theih nan duhsakna ka hlan che u a, theihtawp kan chhuah tlang dawn nia, a ti.

Dr KC Lalmalsawmzauva, Adviser to CM pawhin thusawiin, sorkarin sawhthing a lei atanga chiang taka lo lang chu Samthang leh a chhehvel tlang dungte hi in taima a, in thawkrim tih hi a ni. Mizoram pumah tunah hunah hian nikum aiin kan la hralh chhuak tlem a, kumin bika support price kan pek tawh chin hi Rs. 18 Crore vel a ni tawh a. Kuminah SCC 24 velah Rs. 50 leh a chunglama kan hralh avangin nikum ai chuan Support Price hi kan seng tlem zawkin a rinawm, a ti.

Sawhthing Kut hi Organising Chairman Lianzika'n a kaihruai a, VCP Lalchungnunga'n kalkhawmte lawmna a nei a, Sawhthing Association President Lalparliana'n thu a sawi bawk.

Samthangah hian chhungkua 230 vel a cheng mek a, a tam zawk hian lo neiin ei an zawng a, Sawhthing bakah Fur Zikhlum an ching nasa bawk a ni.