“Ruihhlo Do tu kan nih loh pawhin, Ruihhlo Do tute thlawptu tal nih i tum ang u”

Aizawl | May 16, 2026: YMA Sub- Hqrs, Khawzawl Inkhawmpui vawi 2-na chu nimin khan Khawzawl Vengthar YMA Hall-ah hman a ni a. He hun hi Central YMA General Secretary Prof. Malsawmliana leh CEC member engemaw zatin an hman pui.

Chawhma a Vantlang Inkhawm hi Sub- Hqrs YMA Vice President Vanlalsawma Colney-in a kaihhruai.

Kumpuan “ Ruihhlo Do” thupui sawitu Prof Malsawmliana, Central YMA General Secretary chuan, “Ruihhlo dona kawnga ke pen ve thei lo te pawhin thlawpna kan pek a tul.

Mipui thlawpna kan hmuh hian hmalak a nuam a, a phurawm bawk. Thahnemngai taka ruihhlo dona kawnga pen chhuakte lo pawngpaw sawi sel ngawt zel hi a tha lo. Kan che chhuak thei lo a nih pawhin a dotute lo thlawp hi kan mawhphurhnaah ngai ila.

“Ruihhlo ngaite leh zuarte hian hlauh an neih a ngai. Zalen taka khawlaia ruihhlo tih ringawt te hi a rem lo, khawtlangin kan phallo a nih tih an hriat nawn fo a tul. Hlauh an neih loh avangin ualau takin an ti ngam a. Tihtit an ngai.” tiin a sawi.

Chawhnu lamah Central YMA kaihhruainain kum

2026-2028 chhunga Sub- Hqrs YMA hruaitute thlanna hun hman a ni.

Sub- Hqrs YMA, Khawzawl huamchhungah hian Group YMA 4 leh Branch 42 an awm a, YMA member hi 19861 an awm.