Dengue dona ni hmang

Aizawl | May 16, 2026: Health & Family Welfare, National Health Mission hnuaia National Vector Borne Disease Control Programme (NVBDCP) chuan vawiin khan, “National Dengue Day” (Dengue Do na ni) an hmang.

National Dengue Day hi Ministry of Health & Family Welfare, Government on India ruahmanna in kum 2016 atang khan hman tan niin, mipuiten Dengue natna chungchanga kan hriat tur pawimawh leh he natna laka kan him theihna tur atana inzirtirna hun atan hman thin a ni. Hemi ni pual bik hi Mizoram a District hrang hrang ah te pawh hman niin, TV, Chanchinbu lamah te mipui zirtirna tihchhuah a nih bakah School, Kohhran, Khawtlang leh pawl hrang hrang te nen hlawkthlak taka hun hman ho a ni bawk.

Dengue natna hi India ramhmun hrang hrangah a hluar hle a. Mizoramah kumin Jan – April, 2026 chhungin Dengue natna vei rinhleh mi 2055 endik niin, natna hmuhchhuah mi 132 an awm a, nunna chan an awm lo. Kum 2025 chhunga Dengue natna vei hmuhchhuah zat 1482 niin,nunna chan an awmlo ani. India ram pumah kum 2025 a Dengue natna vei hmuhchhuah zat chu 121824 (nuaih khat sing hnih sangkhat zariat sawmhnih pali) niin, nunna chan mi 131 an awm. Kum 2026 Jan leh Feb thla chhungin Dengue vei mi 6927 hmuhchhuah tawh niin, nunna chan mi 10 an awm tawh a ni.

Dengue hi natna chi khat virus in a thlen a ni a. He natna hrik (virus) hi thosi in a pu darh thin a, chuvangin thosi seh atanga inkaichhawn theih a ni. Dengue natna thehdarhtu thosi hi thosi tamtak zinga thosi chi khat, Aedes Aegypti thosi (mizote’n thosi rang kan tih) hi a ni a. He natna hi a tirah uluk taka Symptomatic Treatment pek a enkawl vat anih chuan taksa chak pangngai ah chuan a dam leh vat thei a. Amaherawhchu, enkawl mumal loh anih chuan system hrang hrang khawih chhia in Dengue Hemorrhagic Fever (DHF) ah a lut thei a ni. Dengue Hemorrhagic Fever (DHF) alo nih tawh chuan enkawl dam a harsa tawh a, thihna hial a thlen ta thin a ni. Dengue natna lanchhuah dan tlangpui te chu khawsik sang tak, Lu leh chalbawr na, Taksa/Tihrawl na, Thak/Vual te an ni. Health Dept chuan hetiang a insawiselna nei te chu Dengue natna ani thei tih hria in, a rang lamah thisen test tir thin tur in a ngen a ni.