Pro Volleyball | Hunthar-in 3 - 1 in Sihphir an hneh

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 2 : May 15, 2026 : Zirtawpni Zan

Hunthar def Sihphir (mipa)

= 19-25, 25-20, 25-16, 25-22 (3-1)

* A tir lamah insiam rem mai lo mah se Mizoram Rural Bank Pro Volleyball League-a an inlan vawi khatnaah Huntharin team dang tan vaukhan an chhuah nghal a, Sihphir beiseina beng hniamin set hnihna atangin inkhel an thunun tluan.

* Set hmasa ber an hloh hnuah Hunthar coach VL Malsawma Renthlei chuan player-te khelhna dan tidanglamin tan hmun an siam tha a, Mizorama a inkhelh hmasak berah Uttar Pradesh atanga an lak luh Suryansh Tomar chuan vawi 32 vaw tlain point 12 a hloh a, Kuriz Player of the Match lawman a dawng nghal. Fabian Lallunghnema leh Lalbiakmuana'n point 10 chuang ve ve hmu bawkin Huntharin nuam ti takin an khel a, tawn hriat an neih that lantirin ruahmanna leh thiamna hmanga inelnaah an chungnung.

* Season liam taah champion lai ni chungin mipa team paruk inel zingah Hunthar an hniam ber a, league vawi nga an khelhah tum khat chiah chakin kai thar Sihphir an hneh a ni. Tun tumah an champion hnuhnun ber 2024-a an player pawimawh pahnih setter Remsangzuala leh spiker Fabian-a an la kir leh a, kum zawn 2017 leh 2018 champion an nih laia an player langsar Biakmuana an ko kir bawk. Team tichak leh zual tura an lak luh Suryansh a che tha nghal a, an khelh hmasak ber atangin Pro Volleyball chanchina team hlawhtling ber an nih tawhna boruak an chhem alh thar leh.

* Nilaini zan khan Sihphirin a umtu zawk ni chhungin Chhinga Veng Spiker an hneh a, inrintawkna an neih san vanglai takin league round hmasa bera awl Hunthar an hmachhawn. Inkhel an tan rualin team boruak tha an chhawm lut a, Kerala atanga an chawk luh Niyas chuan a vaw sual mang lo; Albert Zothankhuma'n lehlam innghahna pahnih Suryansh leh Fabian-a vuak a dansak fo bawk a, set hmasa ber an lak hnuah che tha zui zelin Vanlalawmpuia'n Fabian-a vuak a dansak rualin 11-7-in set hnihnaah an sang hman.

* Huntharin an player-te ball an vuaktirna hmun tidanglamin nasa leh zualin Sihphir point hmuhna khawlpui an veng zui bawk. Niyas leh Sihphir hnungtawlh hret hretin lehlamin an nawr na tial tial a, Suransh chuan hlap tla zawnin 16-13-in Huntharin an lehpel a, hawi kir tawh lovin set hnihna an la.

* Hunthar an insawh nghet telh telh a, setter tawn hriat nei Remsangzuala'n awmze neiin ball a sem a, Suryansh mai bakah 2024 Mizo Best Player Fabian-a'n rin tlakin a ball hmuh point-ah a chantir thei a, veikhawr Biakmuana'n na takin vaw lo mah se fing takin a hlap tla thin bawk. Sihphir talbuaiin an rin ber Niyas chuan vuak tlak a harsat a, insiam that leh tumin inthlak kual mah se boruak an chawk nung zo tawh lo va, a tawp thlengin a bet zawkah an tang tluan a ni.

* Chhinga Veng an hneh tumin Niyas chuan point 36 a hmu a, Hunthar hmaah tum 27 chiah hlap tlain point a hloh zat erawh 20 ve ve niin a inang. Albert-a'n point 11 hmuin Lalneihpuia Hrahsel leh Lalramhluna'n tum riat ve ve an hlap tla a, player-ten hnuhma an neih dan khaikhinin Hunthar an el zo lo deuh.

* An khelh hmasak bera an chet dan atangin vawi thum champion tawh Huntharin el tham tak an ni tih an lantir tel a, May 18-ah inlan lehin rin hlawh zawk ni chungin Khawbel an khelhpui ang. Intuai thar leh tura hun thawl an mamawh angin round thumnaah Sihphir an awl ve thung dawn a, hriam zawka kir leh tumin May 21-ah an khel leh dawn chauh a, champion lai Anastasia Electric Veng nen an inhmachhawn ang.

Kuriz Player of the Match

- Suryansh Tomar (Hunthar)

Cheetak Fan of the Night

- Rosie Lalrinsangi (Hunthar)

STATS :

HUNTHAR

Suryansh Tomar : Point Hmuh - 32, Point Hloh - 12

Fabian Lallunghnema : Point Hmuh - 12, Point Hloh - 4

Lalbiakmuana : Point Hmuh - 11, Point Hloh - 2

Lalbiakmawia Khiangte : Point Hmuh - 5, Point Hloh - 3

Remsangzuala (setter) : Point Hmuh - 3, Point Hloh - 1

SIHPHIR