Lirthei chetsuala thihna thlenga mawhphurtu nia rinhlelh pahnih man; Zonuntluangi chu tunge??

Aizawl | May 15, 2026: Aizawl Chanmari venga lirthei chetsuala thihna thlenga mawhphurtu-a rinhleh mi pahnih te chu vawiin khan Police-in an man a, naktukah Court-a hruai an ni dawn.

Zonuntluangi

Tarlan tawh angin nizan zan lai dar 12 vel khan Zarkawt atanga Chanmari lam pana tlan Scooter leh Chanmari atanga Zarkawt lama pana tlan Bike chu Chanmari-a Ch. Saprawnga Building tualah an intai a, Scooter hi tlu-in a chuangte nanper chhuak a, Scooter hnunga chuang Thingsulthliah nula kum 23 mi Zonuntluangi d/o PC Lalvuana chu anmahni taitu Bike hnunga tlan Bike dang pakhatin a chil zui a, a hmunah ka pawh chhawn loin a thi nghal a ni. CCTV atanga a lan danin, Scooter taitu Bike-te hi Wrong Side-ah an tlan a ni.

an chetsual hnu lawka thlalak

Meichher News-in a tarlan danin, he vanduainaa boral ta Nula Zonuntluangi hi Tuikual North-a Cafe pakhata thawk a ni a. Nizan dar 11:30 hnu deuhah dawr an khar a, hemi hnua an haw lam chu an chesual ta ni-a rin a ni. Zonuntluangi hi dawrah hian ni hnih chiah a la thawk hman nia hriat a ni.

a ruang zalnaah 'Rose'

Zonuntluangi te in

Zonuntluangi ruang hi vawiin khan Civil Hospital Aizawlah endik a nih hnuah an khua, Thingsulthliah panpui a ni a, vawiin chawhnu dar 2 khan vui nghal a ni.

May 15, 2026 - 9:40 a thlalak

Zonuntluangi chu tunge??

Thingsulthliah aṭanga Explore Mizoram thudawn danin, Zonuntluangi te hi unau pang niin, mipa 1 leh hmeichhia 4 an ni a. A upate pahnih - mipa pakhat leh hmeichhe pakhat hian, nupui pasal neiin in hrang an chang tawh a.

Amah hi unau zinga naupang ber niin, kuthnathawk chhungkua an ni a, zirna lamah pawh a zir sang thei lova, Rural Development (BDO) kaltlanga skills trainingah a training ve a.

An unau hian, in tha neih tumin theihtawp an chhuah a, harsatna tam tak paltlang huamin theihtawp tak meuh meuhin an bei a, a u chiah hi Aizawl-ah mi inah a awm a, a u pakhat chu phai-ah a awm bawk a. Ani pawh hi phai lama a awm ren rawn hnuah, a rawn haw a, Aizawlah Cafe-ah a thawk leh a, heti hi a ni ta a ni.

A nu leh pa hi, a rem rem thawkin an inhlawh thin a, JNV Thingsulthliah-ah labour angin an thawk mek bawk a ni.