MRF MoGrip FMSCI National Supercross Championship 2026 Season Round 3-ah Mizo tlangval Shaun-a'n trophy a chawi

Aizawl | May 19, 2026: India rama Bike intlansiak a inelna MRF MoGrip FMSCI Supercross National Championship 2026 Round-3 na chu May 17, 2026 chhun khan Coimbatore, Tamil Nadu ah neih a ni.

He National Championship-ah hian Mizoram aṭangin Shaun Lalremruata Chhangte, College Veng Aizawl ami chu Private in a tel ve leh a. India ram pumpuia no.2 a nih mekna Private Expert Class-ah tlan lehin, a bike-ah harsatna awm chungin a tlan a, 4-na ni tura ngaih anih laiin finishing line thlen dawnah a hma ami rawn zuan khumin 3-na nomawi a zuk chawi leh ta. Category dang erawh a bike ṭhat tak loh avangin a tlan chhunzawm thei ta lo a ni.

Tun ṭum-ah pawh hian Shaun-a hi a ṭhianpa Vanlalhmangaihsanga’n Pit Mechanic turin a kalpui leh bawk a ni. Ani hi Mizoram atanga hetiang ang inelna a tel hmasa ber leh tel awmchhun a la ni a, podium a lawn leh thei hi a lawmpuiawm hle a, nikum hmasa 2024 khan trophy 4 lai a lo hawn tawh a, nikum 2025 khan trophy 3 lai a la thei bawk a. May 18, 2026 Monday khan Aizawl ah a lo haw leh nghal a ni.

Tun Season kal lai mek hi kum chawhnu lam Ber thla lama chhunzawm leh tur a ni a, Shaun-a hian lawmman a la thei hi Pathian vang chauh a ni tiin a sawi a, amah lo ṭana lo ṭawngṭaipuitu te zawng zawng chungah lawmthu a sawi tak meuh meuh a ni.