MIZOTE HIAN CENTRAL POLITICIAN TUR KAN VAWRH CHHUAK VE TAWH DAWN EM?

- James Ramdinmawia

Meghalaya chuan Lok Sabha MP pahnih lek nei chungin Lok Sabha Speaker te, Union Cabinet Minister te, Governor te an nei thei. Arunachal Pradesh chuan Lok Sabha MP pahnih chauh neiin Union Cabinet Minister an nei mek. Nagaland-in Lok Sabha MP pakhat chauh neiin Governor te an thlawh chhuak thei. Manipur pawhin Lok Sabha MP pahnih lek nei chungin Union Minister an nei thei bawk. Assam erawh Lok Sabha MP 14 lai nei an nih avangin Union Minister hi chu an nei deuh reng.

State pakhatin MP kan neih tam leh tam loh lam aiin kan mi vawrh chhuahte Capability leh Caliber avang zawk hian kan țhenawm State-te chuan India Sorkar mi pawimawh an nei nawk țhin. Chungho thuhnuaiah chuan kan kun mek zel a, Mizoram-a kan Minister-te pawh an khawngaihna dilin an zu inphahhniam duk duk țhin. Eng nga ti nge Union Minister ni thei tur leh Central Politics-a nâ taka tăl ve ngam tur leh huhâng nei thei tur mihring kan vawrh chhuah ve mai țhin loh?

Mizo zingah chuan Dr C Silver-a kha Union Minister of State a ni ve tawh a. Chu pawh kum 30 kal ta daih tawhah khan a ni. Mizoram ațanga kan vawrh chhuah ni lo, ama inhaikuak avanga Bangalore North Constituency ațanga Lok Sabha MP-a tling, Dr. H.T. Sangliana kha Vice Chairman, National Commission for Minorities (Minister of State rank) a ni tawh bawk. Ka hriat sual loh chuan anni lo hi Central Politics-a langsar leh dinhmun pawimawh chelh pha Mizote hian kan la nei lo. Mizoram ațanga MP (Lok Sabha or Rajya Sabha)-a kan vawrhchhuah tawhte reng reng an awmna Party-in Mizoram Constituency ațanga Candidate-a an dah nawn tawh loh hun huna an Career tawp ta deuh vek an la ni. Central lama mahni theihnaa inham tâng chhunzawm thei kan la vawrhchhuak lo.

Central Politician kan tihte khu tute nge? State hrang hrang ațanga kalkhawm ve tho an ni. Tumah Central bik an awm lo. Tuna kan Prime Minister Modi leh Home Minister Amit Shah te pawh hi Gujarat lam mi daih an ni. Union Minister hrang hrangte khu State hrang hrang ațanga kalkhawm ve tho an ni. Eng vangin nge keini State hian chutiang mi, State hrang hrang ațanga kalkhawm ve thote chu kan chung en tlat reng? Eng vangin nge anmahni anga India rama roreltu ni ve thei tura kan inngaih loh tlat? Kan mi vawrhchhuah tur kan thlan uluk a ngai.

Hindi thiam kher a ngai te kan ti țhin. South Indian Politician-te khuan Hindi an thiam lo, an thiam reng pawhin an hmang duh lo. Chuti chung chuan President of India te, Prime Minister te, Governor te, Union Minister te an nei thei tho. Central Politics-a huhang ngah tak takte an ni thei.

Term khat MP nih chhunga hnamdang MP-te pawhin țhianțha leh Leader ena an en theih, Central-a huhang nei lian leh Voice nei lian pha, Vaiho ngaihsan tura mahni in-project thiam, a MP-puite pawh chung en tlat lova anmahni Level-a indah thiam, Mizoram Constituency ațanga Candidate-a kan vawrh nawn tawh lo a nih pawha State dang khawi lai Constituency emaw ber ațanga Lok Sabha or Rajya Sabha-a invawrh tling chhunzawm thei tur mihring hi i zawng ve tawh ang u. Mizo zingah chutiang mi chu kan awm em em ang.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]