YMA Day pualin Mizo Welfare 19, Damdawi In leh home ṭhenkhatah thilpek hlan dawn

Aizawl | May 26, 2026: Central YMA Executibe Committee chuan, kumin YMA Day vawi 91-na pualin India ram hmun thenkhata Mizo Welfare 19 leh Damdawi In thenkhatah Chibai bukna pek nise an ti a, hei bakah hian TBCC, OKM leh TNT ah te Buhfai pek tum a ni bawk. YMA Day pual hian TBCC ah Health Clinic neih tum a ni bawk.

Central YMA Executive Committee chu nizan khan Central YMA Committee Room, Tuikhuahtlang-ah an ṭhukhawm a, Central YMA President R Lalngheta'n a kaihruai a, member 61 an kal.

YMA Rorel Inkhawm vawi 5-na, October 22,2026 a neih turah inbuatsaihna atan mawhphurhna hrang hrangte inruat a ni bawk.

Mizoram mamawh LPG phurtuten kawng lakah an lo ti chingpen thin chu ngaimawhawm an ti a, a tul anga hmalak nise an ti a. Gas Agency te pawh kawm nise an ti bawk. Mizorama dan lova hnamdang sumdawngte chungchangah nasa zawka hmalak nise, Branch YMA te an huamchhung theuhvah chak zawka hmala tur leh hetiang mi dap chhuak tura inngen nise an ti bawk.

Electoral Roll endikna runpui, Special Intensive Revision ( SIR) neih turah khua leh tui dik tak ten an chanvo an neih ngei theihnan leh Electoral Roll dik leh rintlak kan neih theihnan theihtawp chhuah nise tih a ni bawk.

Kumin August thla chhungin Inter- Branch YMA Beat Contest buatsaih nise tiin an rel bawk a, September thlaah Mizo Infiamna hmanga Branch inelna buatsaih turin an lo rel tawh bawk.