Mizoram Rural Bank Pro Volleyball League-ah a bika siam, 'Vakul' ball hmang dawn

Aizawl | May 8, 2026: Mizoram Rural Bank Pro Volleyball League-ah Nivia-in a hranpaa ball an siam 'Vakul' hman a ni dawn a, nimin khan LPS Vision Director Lalsawmliana Pachuau chuan a tlangzarh.

Infiamna bungrua leh hmanraw hrang hrang siamtu company Nivia-in kum dangah pawh Pro Volleyball-a hman tur ball a tumsak thin a. Kuminah pawh spot volley tumsak leh tho mah se Mizoram volleyball inelna sang berin mipui hlut hlawha hma lam a pan zel avangin a hranpa liau liauin a siamsak a, a bika ball hman turah hian a hming 'Vakul' tih chhut kai a nih bakah Pro Volleyball logo nem kai a ni bawk.

LPS Vision office, Zarkawtah Organising Committee Chairman Sawma'n a tlangzarh rualin, Pro Volleyball tan thil thar leh hmasawnna chhinchhiahtlak tak a ni tih a sawi a, LPS leh Mizoram Volleyball Association (MVA)-in India rama company lian ngaihven tham inelna an buatsaih thei chu thil lawmawm tak a ni, a ti.

MVA Vice President C Lalrokhuma chuan Mizo nun hluiah, thangchhuah leh khuangchawi theite chauhin Vakul chang an tawn thei a, Pro Volleyball pawh Pro Division-a awm club-te chauhin an khelh theih inelna sang a ni a, chuvangin ball hming atan Mizote tana sava pawimawh tak 'Vakul' tih phuah a nih thu a sawi bawk.

Pro Volleyball vawi kuana atan kawng hrang hrangin inpuahchahnain a vawrtawp a thleng chho mek a. May 11, kar leh thawhtanni zanah LPS Arena, Falkland-ah mipa team sarih inel tanin a hawn zanah champion lai Anastasia Electric Veng leh Thutak Nunpuitu Team an inkhel ang.

Hmeichhe lama team pali an inel ve thung dawn a, June 1, thawhtanniah tan ve thungin Eric Pautu Academy leh ITI Veng GSA, Tuichangral leh Chhinga Veng Spikers an inkhel dawn a, an inlan kim nghal vek ang.