AIR90 Walkathon - Aizawl, Lunglei leh Siaha-ah

Aizawl | May 8, 2026: All India Radio (AIR) kum 90 tlin lawmna pualin tukin khan Aizawl, Lunglei leh Siaha-ah Walkathon huaihawt a ni a, District hrang hranga AIR-a thawktuten ke a kalin kum 90 tlin lawmna pual hi an hmang a ni.

Walkathon hi AIR Aizawl, Lunglei leh CSR Siaha ah te buatsaih niin Aizawl ah chuan AIR Station Tuikhuahtlang aṭanga Millennium Centre thleng ke a kal a ni, he hunah hian All India Radio Aizawl Director leh Mizoram Cluster Head DR Lalropuia chuan khawvel changkang zelah midang inngaihsak tawnna a tlem chhoh mek laiin All India Radio Aizawl chu khawhar leh lungngai hnemtu a ni a ti a, midangte awi tlei tu ber ala ni reng tih sawiin Radio thuchhuak chu mipuite rin ala ni tih a sawi.

DR Lalropuia chuan AIR Aizawl leh AIR Lunglei chu hmarchhak station zinga ṭha pawl ani tih sawiin tunlai thiamna E-Office hmang hmasa zinga mi ani a ti a, ram pumah a ṭha pawl ni thei turah ṭan lak zel a ṭul thu sawiin thawktute theihtawp chhuah turin a chah a ni.

All India Radio kum 90 tlin lawmna pual hian AIR Aizawl chuan hun pawimawh hrang hrang buatsaihin a khuh hawn nan Lamp Lighting bakah 90 Years Musical Concert te a buatsaih a, a lawmna pui ber hi June ni 8, 2026 khian Vanapa Hall-ah Chief Minister Lalduhoma hovin an hmang dawn a ni.

All India Radio hi June 8, 1936-ah din niin, New Delhi-ah Headquarters a awm a; AIR Aizawl leh AIR Lunglei hi India ram puma AIR Station 230 zing ami a ni.