Mizo zinga hmasa ber turin CBCI official Advisor atan Jonathan Lalremruata ruat

Aizawl | May 23, 2026: Mizoram tan a vawikhatna atan leh Mizo zinga a hmasa ber turin, Catholic Bishops’ Conference of India (CBCI) chuan Jonathan Lalremruata, Leitan Durtlang, Aizawl chu Official Advisor to the Catholic Bishops’ Conference of India atan an ruat. A appointment hi India ram Bishop Conference aiawhin Aizawl Bishop Most Rev Stephen Rotluanga CSC-in Bishop House Ramthar veng, Aizawlah a hlan a ni.

A hlanna-ah hian Jonathan Lalremruata hi a nupui Nancy Lalremruati, Bishop Secretary Rev Fr Jerome Vungbiakdika leh Diocese Pastoral Council Office Bearer ten an tawiawm a ni.

He a ruatna lehkha hian Most Rev Anil Couto, Metropolitan Archbishop of Delhi & Secretary General, Catholic Bishops’ Conference of India seal leh a signature a chuang a ni.

Thudawnnain a tarlan danin, Jonathan Lalremruata'n hetiang dinhmun a thlen theihna chhan hi Kohhran tan leh Vatican leh India sorkar inlaichinna lama a hnathawh an hriat avanga Vatican palai rawtna atanga rawn chhuak a ni. Amah hi Catholic Kohhran mai bakah India rama Christian zawng zawng tan tangkai taka a thawh ngei beisei a ni.