MZP Hnahthial zirlai tiṭha chawimawinaa Speaker Lalbiakzama thusawi

PU LALBIAKZAMA, SPEAKER, MIZORAM

MIZO ZIRLAI TI THA TE CHAWIMAWINA, 22.05.2026,

GSA HALL, ELECTRIC VENG, HNAHTHIAL

Kan hun kai hruaitu, hunserh hmangtu – Pastor C Lalhmangaihzama, MLA zahawm tak - Pu Jeje-a, kan hun Uaptu, MZP Gen. Hqrs Vice President Sanghmingthanga, DEO Pu Mickey-a, Hnahthial Hqrs. MZP hruaitute, Zaipawl leh artist thiam tak tak te leh kan chawimawi mek zirlai duhawm tak tak te leh he hun a rawn kalkhawm zawng zawng te, in vaiin Chibai vek u le.

MZP Hnahthial Headquarters ten he hun pawimawh taka min sawm hi ka lawm a. Tunkar kalta-ah khan Churrachanpur-ah Hmar Martyrs’s Day hmangin kawng thui tak kan han zawh a. In sawmna hi ka ngaihhlut em avangin hah pawh sawi loin in zingah ka rawn tel a ni.

‘Education is all round development’ an lo ti thin a. Mihring te mihring kan nihna phur chhuak zo tura chherna pûm chu zirna hi a ni. Keipawh a mimal taka zirna ngaisang ka ni a. Ka bial hmasawnna turah pawh ‘Zirna leh hriselna’ te hi ka dah pawimawh hmasak ber an ni.

Zirna chuan tawp-in-tai a nei lo a, kan pianni atanga kan thih ni thlengin kan inzir reng tur a ni. Zirna a hlawhtling tur chuan zirlai te inpekna bakah tanpuitu zirtirtu pawl ho an pawimawh hle. Chung zingah chuan Zirlai Pawl te hi a pawimawh ber zing ami in ni. Mizo te kan vanneihna chu Zirlai Pawl tha tak MZP kan nei che u hi a ni. Zirna mai bakah zofa te hnam anga kan dinchhuahna tura meichher chhitu in ni.

Vawiin hian zirlai ti tha te chawimawi turin kan kal khawm a ni a. Hetianga chawimawi theih tura buatsaihtu department lama thawktute, zirtirtu leh zirlai chhung te, in chungah lawmthu ka sawi bawk e.

Mizo nih hi a nuam a, pawl leh khawtlangah kan inhmang nasa a. Chutih rualin sawrkar laipui hna sang kan ban pawh ta mang lo hi a vei-awm a. Kan ram a retheih lai, rual kan el lai kha kan pha ta lo hle. Tun hnai kum 20 zet kal ta atang phei kha chuan Mizoram pawn a zofate hian central sawrkar hnuaia hna lakah chuan min awi nung a ni ta hawt mai. Hrehawmna atangin tumruhna an nei ta zawk em ni tih te a ngaihtuah theih a. Kan tan a ngai hle mai.

Mi then khat sawi dan chuan, kan lehkha thiam te pawhin an tum tlangpui chu, phaiah IAS Coaching an kal a. Chung ho tan chuan state service exam chu a awlsam a. IAS a tana chher te khan state service hi an tin zawn thup mai ang te’n an sawi a. Kan mithiam ber ber te’n chutiang rilru an lo pu tak tak a nih chuan Central sawrkar hna sanga luhna kawng chu a zim hle tihna a ni ang.

Kan ngaihtuahnaa awm tura ka duh, a hnam pum zirlai leh kan zirlai hruaitu te’n in thinlunga in riah tir tura duh pakhat ka nei a. He ti hian ka ngaihtuah thin, ‘Kan zirlai thiam bikte hian All India Service leh Central Service an tinzawn a. Luh a lo har hle mai a. Tlin loh chuan State Service ah an sirtluk a. Zirlai tam zawk, thiam fal ni ve lo, thiam tak tak si, a majority zawk hian Mizoram sawrkar ah hna kan tinzawn a, hna in min daih si lo a, kal ngaihna hre loin kan hawihai thup mai ni hian ka hre tlat a’.

Central sawrkar hnuaiah hian Group B hna tha tak tak a tam em em a, an la zing bawk. UPSC kher tinzawn lo hian Staff Selection Committee leh a dang te hnalak hi ngaihven ang u . Service a thawk tha tan phei chuan exam kaltlangin Group A hna sang tak tak a kai theih a. Hei hi a nawlpui hian bawh i la ka duh a ni. Heng hnaah hian mizo ni lo, tlang mi leh zo hnahthlak state pawn ami te an lut tam em em a. A hnam ang pawhin kan chhawr tangkai hle a ni.

Zirlai chu a tum a ruh tur a ni a. Mi tih theih ang nih ve tum a tawk lo a, miin an la tih theih loh, tum pawh an tum chhin loh tih a tum ngam tur a ni. Thufing chuan, ‘Tumna a san leh tlakna a sang’ a lo ti a. Kan tum a ruh ang a, thil ropui tak tih kan tum bawk ang. Kan tum ang kan thleng pha ta chiah lo a nih pawhin kan tum a san chuan kan phak tawk kha a hniam thei lo a ni.

Tunlaiah Computer leh Phone hian kan hun a ei tam hle tih kan pawm tlang awm e. Games, social media, reels, you tube, movie leh a dangah hian kan hun engzat nge kan hmanral le? Tunhma chuan sawrkar leh company-a hna thawk turin ziak leh chhiar a tul a. Computer khawvelah computer thiam a ngaih belh a. Computer thiam lo chu ziak leh chhiar thiamlo ang deuh thawin sawrkar hna pangngai chinah pawh an lut thei lo ta hial a. Tunah chuan AI (Artificial Intelligence) hre thiam lo tan harsatna a tam leh ta hle mai. AI nihna leh a tangkaina tun hunah hian kan sawifiah hman dawn lo a. AI thiam te hi khawvel a sawrkar leh Company a hlawh sang ber ber te an ni leh ta. Computer leh phone te hi kan hun kan eiral tir rau rau chuan ‘Games satliah-ah inhnangfak mai loin AI thiamna lam kawng zawhna atan i hmang tangkai ang u’ tih hi vawiina zirlai fing tak tak te hi ka chah duh che u a ni. Thiamna bul thut (Basic Knowledge) neilo chu mi chhawr-na-awm lo kan nih hun hi a lo la thleng thuai dawn niin a lang.

Tin, sawrkar hna kan hmu vek lo ang. A hmu pawhin hna sang kan hmu vek lo ang. Kan nih chinah a tha ber nih kan tum tur a ni. Officer lian zingah a tha ber nih kan tum ang. A tenau deuh kan nih chuan chung ho zinga a tha ber nih kan tum ang. Peon kan nih pawhin peon tha ber nih tum mai tur. Loneitu kan ni thei, beautician kan ni thei, puanthui kan ni thei, nitin inhlawhfa chawp te pawh kan la ni ang. Eng mi pawh ni i la thawkrim leh taima ber nih tum mai tur a ni. Hnathawktu zahawmna leh hlawhtlinna hi hna san leh hniam a ni lo a, a thawktu inpekna leh thawrimna-ah a inghat zawk a ni.

Officer lian tak zelthel tak an awm thei, officer lian tak hlemhle tak an awm thei, ruihtheih thila buai te an awm thei. Chung ho ai chuan Peon a hna a rinawm leh taimain zah a phu zawk a, ramin a tangkaipui zawk. Hna lakah pawh hian batch khat a topper te hi hnathawktu tha ber an ni kher lo. Chutiang chiah chuan merit a hniam pawh kum 10 a lo vei meuh chuan an batch a chhawr-na-awm ber an awm chawk. Board exam-a topper hna hmu loa vak ta mai mai a awm theih. Mistiri thiam tak hna thawh tur zawng chawp reng ai chuan inhlawhna thawhsen loh hmutu labour taima leh rinawm te hi mi zahawm an ni zawk.

Zirna hi kawng engkima mi hman tlaka min siamtu a nihna lai hi a taka kan nunpui theih chuan kan ram hian hma a sawn dawn a ni. Chutiang tur chuan tei rei peih a ngai a, chhel a ngai a, tum san ngam a ngai bawk a ni.

A tawpna a tan chuan vawiina zirlai zawng zawng te, tun atang hian in nih thei chinah a tha ber nih tum theuh turin duhsakna ka hlan a che u.

Ka lawm e.