YMA rorelna sang ber dawttu-in Mizo hmeichhiaten hnam dang an neih zel loh nana inzirtirna kalpui chhunzawm zel an rel!

Aizawl | April 8, 2026: Young Mizo Association (YMA) rorelna sang ber dawttu Central Co-Ordination Committee vawi 105-na vawiin khan Central YMA Hall, Tuikhuahtlang-ah an thukhawm a, Central YMA President R Lalngheta'n kaihhruaiin, rorel inkhawm tan a hmain Central YMA Website thar tlangzarhna hun hman a ni. He website hi Arsi Consultancy ten a thlawn a Central YMA tana an siam a ni a. Website enkawl zui dan tur leh inremna thuthlung ziahna hun hman nghal a ni bawk.

Inremna ziahluhnaah hian Arsi Consultancy aiawhin CEO T Infimate leh Business Operation Manager Christopher Lalmuanpuia ten hming an ziak a; Central YMA aiawhin President R Lalngheta leh General Secretary Prof Malsawmliana ten hming an ziak thung a ni.

CCC Meeting Vawi 105-na ah hian General Secretary Prof Malsawmliana hnen atangin Central YMA hmalak tawhna hrang hrangte report ngaihthlak a ni.

Vawiina sawiho tak, YMA Inkhawmpui Lian Vawi 74-na thurel bawihzuina:

YMA KHAWIH:

1.' YMA nihphung, inkaihhruaina leh hruaitute mawhphurhna rampumah inzirtirna neih ni rawh se' tih chu hemi chungchanga Central YMA in hmalakna a kalpui dan tlangpui report ngaihthlak niin hemi kawnga inzirtirna hi nasa leh zual zawka neih nise tih a ni.

2. 'Mizoram chhunga hnam dang sumdawng tam ta lutuk hi ti tlem turin YMA in hma la rawh se' tih chu Central YMA in hemi chungchanga hma a lakna kalpui dan ngaihthlak niin hemi chungchangah hian nasa leh zual zawk a hmalakna kalpui nise tih a ni a, Hemi chungchanga inzirtirna thuziak tar leh semchhuahna kawng a hmalak nise tih a ni.

3. ‘Mizo hmeichhia ten hnam dang an neih zel loh nan Central YMA in inzirtirna nasa leh zual zawkin kalpui rawh se’ tih chu hemi chungchanga Central YMA in hmalakna a kalpui dan ngaihthlak niin hemi kawngah hian hmalakna kalpui chhunzawm zel ni rawh se tih a ni.

4. 'Mizo infiamnate chawisan a nih theih nan Central YMA in hma la rawh se’ tih chu hmala tura ruatten hmalakna chak taka kalpui zel ni rawh se tih a ni.

5. 'Zohnanthlak chi peng hrang hrang Mizoram-a chengte zingah chibil hmalakna a awm tawh loh nan Central YMA in hma la rawn se’ tih chu hemi kawnga Central YMA in hmalakna a kalpui mek dan ngaihthlak niin hemi chungchanga hmalakna hi kalpui zel ni rawh se tih a ni.

SAWRKAR KHAWIH:

1. ‘Inner Line Permit (ILP) hi tun aia khauh leh awmze nei zawka kalpui a nih theih nan YMA in sawrkarah thlen rawh se’ tih chu hemi chungchanga Central YMA hmalakna ngaihthlak niin chak takin hmalak chhunzawm zel ni rawh se tih a ni.

2. 'Tui hna humhalh dan siam ni rawh se’ tih chungchanga Central YMA hmalak dan hi a tul ang a bawhzui zel nise tih a ni.

3. ‘Mizoram chhunga inkalpawhna kawngpui hrang hrang a chhiat avanga mipuiten harsatna kan tawk nasa lutuk thin hi a lo ziaawm theih nan Mizoram sawrkar in tun aia chak zawkin hm la rawh se’ tih chu hemi chungchanga Central YMA hmalakna a niin chak leh zual zawkin hmalakna chhunzawm zel ni rawh se tih a ni.

KUMPUAN, 'RUIHHLO DO' BAWHZUINA :

Chairman sawmna in General Secretary Prof Malsawmliana hnen atangin YMA Kumpuan, ‘Ruihhlo Do’ chungchanga Central YMA hmalakna ngaihthlak niin, Ruihhlo Do-na kawngah hian theihtawp chhuah a hmalak zel nise tih a ni.

Vawiin CCC Vawi 105-na hi Ramhlun North Branch YMA ten hneh takin Central YMA Hall-ah an thleng a, anni hian Reception & Ushering bakah zaithiam thawhchhuahpuiin, anni hian palai te thiam takin zaiin an awi a, an chungah Central YMA chuan lawmthu a sawi a ni.

Chairman sawmna in Central YMA Vice President Prof Lalnuntluanga'n tawngtaina hun hmangin CCC Meeting Vawi 105-na hi khar a ni.