Sports Minister-in Bungzungah Mizo Sports Hall of Fame a hawng

Champhai | April 8, 2026: Sports & Youth Services Minister Lalnghinglova Hmar chuan Bungzung khuaah Mizo Sports Hall of Fame chu khuallian niin a hawng a, East Tuipui Bialtu MLA Ramthanmawia chuan khualzahawm niin a hmanpui bawk.

Khuallian Lalnghinglova Hmar chuan thu sawiin, Tourism Department hian Champhai lam an hawi thu a sawi a, Mizo thul hlui zawng zawng tih theih chu Champhaiah a awm thu sawiin vawiina an hawn tak Mizo Sports Hall of Fame hi khualzin tam tak en luai luai a la nih tur thu a sawi a, khualzin lian tak tak te meeting neihpui theihna tur Mizoramah a la awm loh avangin buatsaih tura hma lak a nih dan tarlangin a hmun atan Champhai an thlan thu a tarlang tel bawk.

Hnahsin Kut 2026 neih leh turah pawh a hlawkna lo tel turin Bungzung pawh an tel ngei a rin thu a sawi a, Hnahsin Kut hmang tura rawn kal khualzinte chuan helamah an tleh phei hum hum a rin thu a sawi a, Bungzung bakah helam tlangdung khuaa Mizo hnam rohlu awmna te hian tlawh a hlawh hle dawn tih a sawi.

India National Games-ah Mizoram infiammite an lan theihna turin ruahmanna an siam, Empowering Mizo Sports chungchang a sawi a, hemi hnuaiah hian discipline 8 - Boxing, Wrestling, Weightlifting, Archery, Badminton, Judo, Taekwondo, Hockey duhthlan tur a awm thu leh chuta tang chuan an duh duh thlangin dilna an thehlut ang a, sawrkar chuan a thlawnin Coach a pe thin dawn a, coach te kalna leh thlan man hi khawtlangin a tum ang, tih a sawi a, hei hi naupang kum 8 atanga kum 15 chin tan a ni dawn a, training atana an mamawh zawng zawng pawh an pek vek tur thu a sawi a, chu chu a hmang tangkai khua nih tum ngei turin a chah a ni. Tun Financial Year-ah hian Hall of Fame cheibawlna atan cheng nuaih 10 (₹10 lakhs) dah a nih tur thu a sawi a, hei hi anmahni in bul an tan ngam vang a nih thu a tarlang tel.

Sports Minister hian Volleyball Court emaw Futsal ground (khawtlang duh dan azirin) siamna atan Cheng nuaih 15 dah a nih thu tarlangin Football leh volleyball bakah net a hlan nghal a, an kal zelna turah duhsakna a hlan bawk.

Khual zahawm Ramthanmawia pawhin thu sawiin, Mizo Sports Hall of Fame hawn a nih theihna tura Bungzung khawtlang thawhhona leh an thawhrimna ropui a tih thu sawiin Mizoram tihmingthatute chawimawina ropui tak an buatsaih chu chhuanawm a tih thu a sawi a, an bialtu MLA takngial pawh hrilh hre duh lova anmahni sensoa an din ngam chu lawmawm a tih thu a sawi a, khawtin leh vengtin te entawn atan a duh thu a sawi. Khawtlang enkawlna kawngah sawrkar pawisa rin tum tlatna hi kalsan a hun tawh thu a sawi a, theihtawp an chhuah tawh hnua lo puih ve chu MLA te tan pawh a phurawm tawh thin a, bul pawh tan hmaa puihna in dil nghal ngawt hi sim a hun tih a sawi bawk.

South Tuipui bialtu MLA Jeje Lalpekhlua bakah S Malsawmtluanga (Mama) Footballer te'n thu an sawi a, Aizawl Bungzung Welfare leh Champhai Bungzung Welfare te'n thu an sawi bawk.

He hun hi Bungzung VCP leh Mizo Sports Hall of Fame Chairman ni bawk Golden-a'n kaihruaiin Rev Samuel Lalmuanpuia Pachuau, bialtu Pastor chuan hunserh a hmang a, Mizo Sports Hall of Fame Committee Secretary J Zakhuma'n report pe in Asst. Secretary T Lalchhuanawma, hnen atangin infiammi chawimawite chanchin ngaihthlak a ni bawk.

Mizo Sports Hall of Fame ah hian infiammi pasarih - K Kawla (L), Jeje Lalpekhlua, S Malsawmtluanga, Lalremsiami Hmar, Lalremsanga, T Zoramthanga (L) leh Jeremy Lalrinnunga te sengluh niin, an lim dah a ni.