Tourism & Sports Minister-in Asian Development Bank hotute kawm

Aizawl | March 30, 2026: Tourism leh Sports and Youth Services Minister Lalnghinglova Hmar chu vawiin March 30 khan New Delhi-ah Asian Development Bank hotute nen an inkawm a, sports leh tourism hmasawnna tura ADB aṭanga ṭanpuina awm theite an sawi a; Finance Ministry lam nen an inkawm bawk.

India rama ADB hotu lu, Country Director Mio Oka hoin Lalnghinglova Hmar hi an lo dawngsawng a, Tourism Minister hian Mizorama tourism lama hmasawnna thleng mek țhantir zel tur leh tourist țhahnem zawk dawngsawng thei turin state budget ringawt a tawk lo a, Externally Aided Project kal tlanga ADB aṭanga loan mamawh a nih thu a sawi.

Lalnghinglova Hmar chuan, "Kan khawpui ber Aizawl hi khualzin tana zan thum châmna daiha siam hi kan thupui pakhat a ni a, chutihlaiin thingtlang lamah eco tourism kalpui a, khawtlang nen ṭang kawpa community based tourism kalpui hi kan thupui a ni a, wildlife tourism kalpui turin Environment & Forest Department nen pawh thawhhona kan ziak tawh a ni," a ti.

Sports Minister ni bawk Lalnghinglova chuan, "Sports hi intihhlimna satliah ni loin tunah chuan eizawnna a ni a, India sorkar pawhin a dah pawimawh tawh hle. Infrastructure piah lama infiammite tihmasawn tura man power development lama kal nat kan duh a, ADB puihna kan mamawh hle a ni," a ti bawk a; sports tourism chu state tana sum lakluhna ṭha a nih theih thu a sawi lang.

ADB hotunu Mio chuan Mizoram sorkar inhawnna lawmawm sa tih thu sawiin tun hma deuha dilna an thehluh an lo hnawl tawh chu Urban Development project an neih mekte nen kaikawpa a hranpaa kalpui dan an ngaihtuah tur thu a sawi a, Finance Ministry lamah bawhzui a tum thu a sawi bawk.

Lalnghinglova Hmar hian Department of Economic Affairs, Finance Ministry lama Joint Secretary (ADB changtu) Baldeo Purushartha IAS pawh a kawm a, ADB lama EAP kal tlanga loan dilna awm mek a sawipui a, Baldeo hian ADB nen a rang lama an lo sawiho tur leh pek ngei a nih theihna turin hmalak a tum thu a sawi a, Mizoramin an hlawkpui tur zawnga project her rem ṭul a tih thute a sawi.

Lalnghinglova Hmar hi Resident Commissioner, Mizoram House, New Delhi Shweta Chauhan, IPS chuan a ṭawiawm a ni.