~ Ruatfela Nu
Feb 12, 2026
Vawiin (12/02/2026) hian Dawrpui Local Council huam chhung, State Bank of India (SBI) bul kawngpui kamah vaipa, ei rawngbawlna gas bur nena inchhawpa ei tur zuar thu hi engtia ngaih tur nge? He vaipa hi eng ILP nge a neih ang? Tourist, a cham theih chin pel rawka chama sumtuak nana Aizawl hmang a lo ni leh palh ang em? Dawrpui LC in thut phalna an pe a nih chuan, a makin tihawm loh ber an ti anga. Dawrpui LC ten an huam chhung kawngpui kama inzawrh phalna an pe loa a inzuar a nih chuan a mak lehzual anga, ‘engtia awm thei nge mihringah’ tih tur a ni hial awm e.
Vai tamzia leh sumdawnnaa chimral kan nih mek chungchang ka vei em em a, mi thenkhat huat khawpin ka tlangau a, chimral nih hi hnam anga a ral thak theih vangin kan hnam ral tur ka ui a, ka vei lo thei si lo. Engtin nge ni ang? Thuneitute’n chimral kan nih lohna turin hma an la tha duh si lo a. Community Base Organization, (CBO) YMA leh zirlai pawl pahnih, MZP leh MSU lah vai an hlau emaw tih mai turin theh hmeh ang maiin an reh rih a. Pu Ch. Chhunga (L) nupui, Pi Rovi article ka edit sak, “Chimral kan awm loh nan i tawngtai ang u” a tih angin kan tawngtai dawn em ni ang? Tawngtai ringawt chu a sawt ka ring lo. Champhai leh Kolasib khawpuiah vai dawrkai an awm lo a, vai dawrkar/sumdawng awm loa district khawpui reng ruang, a hima, a hlima, a din theih chhan zirchian ni se, Aizawl hian an tih angin ti ve se; Chutih a nih loh leh, Champhai ho tih angin ei tur zuar an nih chuan tlangval hoin ei sak liam liam se, thil zuar an nih chuan a ba aia tlawmin lei zawh sak vek ni se a tha mai ang em?
Takana hman deuh nge tunlaiah pawh a la ni tho ka hre lo a: Thingtlang khuaa eichawp dawr lian vak lo hi khawtual miin an bat chat sak vek thei an tia, tak tak a nih chuan mahni chipuite dawrte bak chat sak vek thei khawpa khaw khat bat huai kan nih rau rau chuan ‘vai dawr kal thei, motor car leh bike-a Mizoram thingtlang khaw tam tak hrut kuala thil zuarte hi lo bat chat sak ve vek ni se’ tih ka rawt deuha, tiawmang lo lutuk min ti em? Pi Rovin Chimrala kan awm loh nana tawngtai a rawt ai chuan keiin chimrala kan awm loh nana ka rawt hi a zialo hle chuan ka hre nain ka rawt tho a ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: