- Lalhruaitluanga Chawngte
Footballer a ni a, India ram innghahna a tling ang. Hun puma inkhel, hnaa neih, eizawn nana hmang a ni a, chuti chung chuang theology a zir. Zirna pangngaiah BA a la zir bawk.
 |
| Lallianzuala Chhangte |
Mizo footballer Lallianzuala Chhangte, LZ-a tia koh hian international footballer ni chungin Bible a zir a, man chawiin online course a zawm a ni. 2023 khan kum khat course 'I don't have enough faith to be an atheist' tih a zo a, chumi hnuah a dang a zir chhunzawm leh mek.
"Kei chuan kan zir hi theology ka ti chiah lo a, Bible zirna ka ti mai a. Kan hriatthiam theih tur tawk vela buatsaih a ni a," a ti.
A la naupan deuh laiin India team-a a khelhpui hnam dang pakhatin inthlakna pindanah Isua chungchang a zawt a, Kristian sakhaw lo din dan te, Bible lo pian dan te, chutiang chu a zawt chiam mai; LZ-a chuan a chhang hlei thei ta lo! Chu chu Pathian thu zir a rilruk țanna a ni.
"Kei kha, khang hun lai khan kan la naupang ve ang reng bawk a, han chhan mai dan tur ka hre ta lo a. Ka rilruah a thawk na em em mai a, eng tik ni-ah emaw chuan ka chhang thei tur a ni ka ti ta a," a ti a, a thiam ang angin a indap chho ta tih a sawi.
Online lamah a zir ta a, hmana Isua leh Kristianna chungchang zawttu pawh kha a chhang thlap tawh. "Kristianna hi mawlmang taka din a ni lo tih ka hrilh, nikum hmasa khan," a ti.
"Ka rinna a tinghet. Kristian lote bulah kan awm a, Diwali pawh club-in a lawmnaa khel kan ni a, chutiang hunah chuan rinna lama țanlak hi kan mamawh a. Tin, țhiante bula titi nan pawh ka thil zir hi ka hmang," tiin a hlawkpui thu a sawi.
"Keima tan a țha, Pathian min hnaihtirtu, ka thlarau nun chawmtu a ni," a ti bawk.
Sakhaw dang betute kara an awm thu leh, Daniala te țhianho anga din ngheh a tum tlat thu a sawi a, John Lennox-a thuziak a hlawkpui thu sawiin, John Lennox-a hian Daniala te kha pathian dang betute culture-ah an awm chunga rinnaa a din ngheh thu a sawi a, sakhaw dang culture-ah an awm a nih pawha Pathian tana rinawm a tum thu a sawi. "An temple-a eitur an hlan ka ei ngai lo a, an pathian hmaa kun te pawh ka duh lo," a ti.
BA a zir mek bawk a, footballer ni chunga Bible zir bawk, BA zir bawk nih chu a hahthlak ve țhin thu a zep lo.
"Ning chung chung pawhin ka ti țhin... loh theih lohvin ka zir," a ti a, "Hmasawn tur chuan tih hram hram a ngai," a ti bawk.
Hah hnepin an inkhel a, chau hnawp khawpin an training țhin. Chutiang karah chuan zir a ngai țhin tih a sawi a, "A chang hi chuan a hautak ka ti," a ti.
Football season kal mek 2025-26-ah India rama football inelna sang ISL-in harsatna a tawk a, ISL club-te inkhel lovin an chawl vang vang. 2025-26 season hi 2025 June-a ințan a ni a, ISL hi 2026 February ni 14-ah an țan thei dawn hram! Footballer-te an chawl a ni ber a, thla riat vel chu an hma hun tur hre lovin an awm. Chutiang karah chuan LZ-a hi a awm mai mai lo a, insawizawi leh inkhelh a thlah lo.
An inkhelh theih loh chhung hian an khua Lunglei-ah a awm deuh ber a, insawizawi, gym kal leh inkhelh te a thlah lo. An club Mumbai City-a sports scientist-te biain ei leh in chungchangah a rawn a, ei leh in lamah pawh a invawng tlauh tlauh. Chawl hman a ni lo a, a țang mar pat reng tho.
"Exercise ka la reng. Ei leh in lam nen, ka theih ang angin ka invawng," a ti a, Lungleiah a awm deuh ber thu sawiin, Ṭhuamluaia Mualah leh Lena Stadium-ah a inkhelh țhin thu te, gym-a a kal țhin thu te a sawi.
Ni tina a tih tur a ti theiah a ngai a, an inkhelh loh chhung hian a ke ding lam hman a zir nasa bawk. LZ-a hi veikhawr a ni a, a ke ding lam hman kawnga hmasawn a tum a ni.
Thil a kal tluan lai pawhin chawlh laiin a chawl ngai chuang lo; "Off season-ah pawh ka chawl ngai lo, chawlh hi ka harsat," a ti hial!
Mumbai-ah sakhaw dang betute karah inkhelin a awm a, rinna lamah pawh a chawl chuang lo, ni tin Bible chhiar leh țawngțaiin fianrial hun a hmang țhin.
"Devotion hi ni tina hman ka tum. Devotion-ah hian Bible chhiar ka inti lo a, ka study ka ti deuh kher. Bible study leh țawngțai hi ka ti țhin," a ti.
(Aizawl Post February ni 10, 2026)
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: