World Anti - Leprosy Day hmang; Mizoramah phar natna vei mi 10 awm mek!

Aizawl | Jan 30, 2026: Health Worker Training School, Kulikawn-ah Vawiin chawhma dar 10:30am khanWorld Anti-Leprosy Day 2026 hmang a ni a. He programme hi Jt. Director (FW) leh State Leprosy Officer, NHM Dr Lalawmpuia Chhangte-in a kaihhruai a. Kalkhawmte lawmna thusawiin World Anti-Leprosy Day hman theih a ni chu lawmawm a tih thu a sawi a. An hmanna tur hmun tak, a tangkaipui turte zinga hman a nih avangin lawmthu a sawi bawk.

Dr Lalawmpuia Chhangte chuan Mizoram-ah kum 1996 atangin Par Natna vei hmuhchhuah a nih thu a sawi a, Phar natna vei hmuhchhuah a nih atanga tun thlengin Mizoram-ah mi 1563 an awm tawh thu a sawi a. Kum 2024-25 chhungin mi 7 enkawl dam an ni a, tun dinhmunah Mizoramah Phar natna vei mi 10 an awm mek thu a sawi. ( Aizawl – 3, Lunglei – 3, Lawngtlai – 2, Serchhip – 1 leh Kolasib – 1)ah te an awm mek a ni.

State Leprosy Consultant Dr Nathan Vanlalhruaizela, chuan Phar natna chungchang zirtirna neiin hmuhchhuah a nih dan te, phar natna vei enkawl dan leh damdawi ei dan te a zirtir a. Health & Family Welfare Department in a thlawn vek a a enkawl bakah damdawi zawng zawng a thlawn a a pek thu a sawi a.

Health Department Official engemaw zat he hunah hian an tel a, hriselna chungchang zirtirna tha tak tak neih a ni.

DEO leh IEC Asst. NHM Isaac Laldawngliana'n Day hlawhtling taka hman a nih theih nana thawktute, Principal Nursing College staff zawng zawngte chungah leh Health Dept. Official eng emaw zatin an telpui avangin lawmthu a sawi.