Larsap-in Mizoram puala din NCC Group Headquarters Aizawl a hawng

Aizawl | January 30, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Mizoram puala din NCC Group Headquarters, Aizawl hawnna hun MZU Auditorium-a buatsaih chu khuallian niin a hmanpui. Group Commander Brig Gunjit Singh Arora kutah NCC Group HQ Aizawl puanzar hlanin a hawng a, Group HQ NCC Aizawl puala siam 'My Stamp' a tlangzarh nghal bawk.

He hunah hian Sports & Youth Services Minister Lalnghinglova Hmar chu Khualzahawm a ni a, Lt Col Clement Lalhmingthanga, MLA; Prof. Dibakar Chandra Deka, VC, MZU; Maj Gen Anurag Vij, ADG NCC, NER leh official pawimawh dangte an tel a ni.

Larsap General (Dr) Vijay Kumar Singh chuan Mizoramin ama pual liau liau NCC Group HQ a nei ta chu lawmawm a tih thu sawiin, Mizoram tana ni chhinchhiah tlak leh hmasawnna mellung pawimawh tak a ni, a ti a. Kum 1964 atangin NCC-in Mizoramah hmalakna leh hlawhtlinna chhuanawm tak tak a neih thu sawiin, inthununna leh hun remchang thalaite siam sak kawngah NCC aia thawh hlawk thalaite telna pawl dang a awm bik loh thu a sawi a. Amah ngei pawh zirlai a nih laiin NCC cadet a nih thin thu sawiin, sipaia luh tumte tan NCC-a tel tluka tha a awm loh thu leh, mihring puitling leh chhawrtlak chher chhuah kawngah NCC chuan a thawh hlawk hle tih a sawi bawk.

Larsap chuan NCC Group HQ Aizawl hawn fel tak chuan Mizoram thalaite zingah NCC hmalakna a thanlen zual tir dawn tih sawiin, NCC cadet-te chu an thupui 'Inpumkhatna leh Inthununna' tih chu tha taka zawm tlat turin a fuih a. Republic Day parade-ah NCC Band Mizoram te'n fak an hlawh thin thu sawiin, hmasawn zel tum turin a chah a. NCC hnuaia hmalakna hrang hrang chuan ram hmangaihna a tinzawn thu sawiin- vantlang rawngbawlna, chhiatrupna thlen thulha chetlakna, thisen pek, leilung leh a chhunga cheng venhim hna leh mipui zirtirna lam hawi an kalpui thinte chuan thalaite khua leh tui tha ni turin a chher thin a ni, a ti a. Adventure tourism tih hmasawn kawnga Mizoram sawrkar hmalakna fakawm tiin, NCC cadet-te pawh hetiang lama an tel tam zel a beisei thu a sawi a. State sawrkarin theihtawp a chhuah zel dawn tih sawiin, NCC Mizoram kalzelna turah duhsakna a hlan a ni.

He hunah hian NCC Mizoram chanchin tlangpui pholanna documentary thlir ho niin, Maj Gen Anurag Vij, ADG NCC, North East Region (NER) chuan Larsap hnenah Group HQ NCC Aizawl banner a hlan a. NCC zir chhuak hlawhtlinna chang mi 5 te chawimawina thilpek hlan an ni a. Group HQ NCC Aizawl Group Commander hmasa ber Brig Gunjit Singh Arora chuan lawmthu sawiin hun hman a khar a. Hemi hnu hian Larsap chuan he huna tel NCC Cadet-te kawmin hun a hmang a ni.

Mizorama NCC batallion hrang hrangte hi Silchar Headquarters hnuaiah a awm thin a. Tunah chuan Brigadier thutchilhin Aizawl-ah ngei Group Headquarters Mizoramin a nei tawh dawn a ni. NCC hi Mizoramah kum 1964 khan din niin, tun dinhmunah hian batallion 4 awm mekin, Aizawlah battalion pathum (20 Mizoram Bn NCC, 1 Mizoram Bn NCC leh 1 Mizoram Air Sqn NCC) te awm mekin, Lungleiah battalion pakhat (2 Mizoram Bn NCC) a awm bawk.

Mizoram sawrkar chuan June ni 18, 2024 khan NCC Group HQ Aizawl din turin sanction letter a tichhuak a. Hmalak chhoh nghal niin July- October, 2025 chhung khan Aizawlah Group Commander, Deputy Group Commander leh Training Officer-te dah an ni a. NCC Group HQ Aizawl hawn tur khuhhawn nan nimin January ni 29, 2026 khan Chief Minister-in NCC Group HQ Aizawl puanzar a lo tlangzarh tawh bawk a ni.