"Lalruatkima leh Lalnunmawia te hian CBI in an chhui theih tura FIR thehlut ngei turin kan phut a, kan lo ngaichang dawn a ni," ~ B Chhanzova

Aizawl | Jan 31, 2026: Revenue Minister leh ZPM Media Chairman B Lalchhanzova chuan vawiin khan thuthar thehdarhtute kawmin, "He thilah hian umzui tur tam tak a awm ngei anga, mipui te pawn thudik hriat hi kan chanvo a nih avangin ZPM party chuan CBl chhuitir ngei kan duh a, Revenue Minister kal chhuak ta Pu Lalruatkima Treasurer MNF Gen. Hq leh Pu Lalnunmawia Chuaungo MPCC Senior Vice President te hi CBI in an chhui theih tura FIR thehlut ngei turin kan phut a, kan lo ngaichang dawn a ni," a ti a.

"An thehlut ngamlo a nih chuan eng emaw hlauh an nei ni ah kan ngai ang. An thehluh ngam ngei pawh kan ring a, IAF ram kaihhnawihah mipui ten thil awm dan dik tak kan hriatfiah phah thei dawn a ni," a ti bawk.

Chhanzova chuan, "Uluk taka Document te han chhui leh an indawr tawn dan han en let hian MNF sawrkar lai khan lo ti fel hman ta se, IAF hnenah hian chatuan atan Mizoram leilung hi an lo hralh fel hmak dawn tihna a lo ni a, mipui te pawn kan hre lo rei viau mai thei a ni," tiin a sawi bawk.

Minister B Lalchhanzova Press Statement

PRESS MEET

Date: 31st January 2026 at Aizawl Press Club

INDIAN AIR FORCE-IN LENGPUI LEH SIHPHIR RAM A LAK CHUNGCHANGA THIL AWM DAN PUANCHHUAHNA:

(Administrative Area 110 acres Air Defence Radar area 5 acres)

MJA member te chibai kan buk a che tunlaia kan rama thil thleng mi tin ngaihven IAF in Lengpui leh Sihphir ram an hawh tur chungchang puanchhuahna huna min tawiawmnaah lawmthu kan sawi a, kan ram himna tur atana ZPM party-in rilru fim tak pu chung leh ram lak dan Acquisition Dan dik taka lAF hnena ram hawhtir tura a hmalakna kan rawn puangchhuak dawn a ni. Zau taka min puanzar sak turin kan ngen nghal bawk a che u.

1. A tirin IAF-te hian Zopuitlang, Theiriat ram, Lunglei-ah ram acquire an duh a, the Mizoram Land Acquisition, Rehabilitation & Resettlement Act,2016 (MLARR Act,2016) hmanga hma lak tum zet a ni a. Nimahsela, ni 02.08.2018 ah IAF/Defence Ministry lamin Mizoram Chief Secretary hnenah Zopuitlang ram acquire an tum chu an duh loh thu leh hmun remchang an zawn zel thu thlenin leh hmun zawnpui turin a ngen a.

2. Ni 15.07.2019 ah Hqrs. Eastern Air Command, IAF chuan Secretary Revenue Dept. hnenah Lengpui Airport chhehvel ah leh Lungdai tlangdungah ram duh ang an hmuh thu leh DC, Aizawl chu hma la tura hriattir tur leh NOC te an mamawh thu a hriattir a. Revenue Dept. chuan Ni 18.07.2019 khan DC, Aizawl hnenah hriattirna pe in, a tul anga survey tur leh report pawh Hqrs. Eastern Air Command, Shillong hnena submit vat turin a ti a, IAF in Ministry of Defence atanga "in principle approval" an hmuh thuai chu thil tul tak niin; Addl. DC, Aizawl chu "single point contact" a hmang tur leh technical area requirement thila co-ordinate tu atana hmang turin MNF Sorkar khan a ruat a.

3. Ni 26-September 2019 khan DC Aizawl chuan Senior Officer in charge Administration Hqr. Eastern Air Command hnenah ram man pawh Rs 185 per Square feet a nih thu te, in Principle Approval a awm tawh thu te, ram lak tur hmun te hi ram hman tangkailoh (Barren Land) a ni a, khawtual mi te pawn harsatna an siamlo a, Environment Clearance leh rehabilitation pawh engmah tih tul a awm lo tiin lehkha a thawn a. No. F/14011/32 7/2019-DC (A) 17-18 Dated 26th September 2019.

4. Tichuan, Addl.DC, Aizawl chuan Command Airforce Defence Office, Shilong hnenah ni 10.06.2020 khan NOC chu a thawn ta a, he lehkha ah hian chu NOC chu lAF lehkha rawn thawn No. EAC/6219/1/7/AD Dated 21-6-2019 a mi behchhan anih thu a tarlang bawk.

5. Ni 02.09.2021 ah DC, Aizawl chuan Defence Estate Officer, Guwahati hnenah GPS coordinates sa thlap Survey Map thawnin; ram neitute leh khawtlang aiawh te nen an thilphut te sawihopuina meeting pawh Ni 25-09-2019 a an neih tawh thu te a hriattir bawk a. Hemi tum hian an phut te, sawisel an neih te, ram Documents & Records te uluk taka endik ho a nih thute; ram man tur sawi fel anih thu-te leh ram man pawh Rs.300/- per Sg feet, te Rs 250/- per Sq.feet te sawi lan a ni a; a tawpa ram man an pawm tlan chu Rs. 185/- per Sq.Feet a nih thu lAF hnenah hian hriattira ni.

6. DC/Addl.DC Aizawl kutah in dawr leh hma lakna tur thuneihna sang tak pek anih avangin "Out-right purchase of land leh negotiations" chu DC level hian hma an la zui ta zel a ni.

7. RFCTLARR Act, 2013 Section 9 leh Section 40 dan tlawhchhan-in State Sorkar chuan thuneihna a neih angin Social Impact Assessment chu National Security thil a nih avang leh a hmanhmawh thlak avangin (danin a phal angin) SIA hi exempt ani ta a (SIA exempt hi tul bik thilah sawrkar hmasa lam ah pawh pek fo thin ani). Ram chu Compulsory-a acquire turin Preliminary Notification Section 11-in thuneihna a pek angin Ni 15-05-2025 ah Revenue Dept. chuan a chhuah ta a ni. IAF te an hmanhmawh avangin Section 11 (5) in Final/Declaration (Notification) chhuah hmaa Preliminary Notification in a phutte chinfel nan thla hnih chhung IAF te hian sawrkar an ngen a, ram neitute nena an in biakrawn fel tawh thu an sawi avangin phal sak an ni a.

8. Revenue Dept hnena IAF leh DC Aizawl ten Final Declaration / Notification chhuah tura an rawn dil chu Revenue Dept chuan, Section 11 hnuaia hma lak turte a la fel em tih dan in a phut anga hriat hmasak a duh avangin Ni 09-07-2025 khan DC Aizawl hi lehkha pe in zawhna siamin Revenue Dept. chuan thil tulte a dil leh te te a.

9. Ni 15.07.2025 a DC, Aizawl chhanna lehkha ah chuan ram neitute remtihna te leh tul dangte tihfel a nih thu leh, Section 40 (4)-in hma lak dan tur sawite, tam tak zawhkim anih thu te sawiin, Section 19 hmangin Declaration/Final Notification chhuah tura a dil chu Preliminary Notification chhuah Ni 15-05-2025 atanga chhiara Ni 62-na, Ni 22-07-2025-ah Revenue Dept chuan Final Land Acquisition Notification a chhuah ta a ni.

10. Tichuan, Final Notification chhuah anih tak avangin Land Compensation Award Rs.1,98,78,55,155/- chu Defence Estate Office (DEO), Guwahati-in DC Aizawl account-a a deposit tawh thu chu DC Aizawl hnenah Ni 09-07-2025 khan a hriattira; DC, Aizawl chuan Ni 24-07-2025 ah sawrkar Approval a dil ta bawk a.

11. Sorkar chuan DC, Aizawl dilna chu uluk takin a zirchiang a, Hon'ble Chief Minister pawmpuina lak hnuah, Mizoram sorkarin 01.08.2025-ah DC hnenah final approval a pe ta a ni. (HCM in a pawmpui hma ni 27-06-2025 (ni 26 hmalam)ah khan DC Aizawl account-ah hian sum hi thun fel a lo ni daih tawh) HCM approval lak atanga ni 9-na; Ni 01-08-2025 ah Compensation Award chu approved in, he mi ni vek hian DC, Aizawl chuan Order for Possession of Land chu a chhuah zui ve ta a ni.

HCM in approval a pek chungchanga a ngaihdan han sawi ta ila "He thil hi kan hriat veleh Aizawl DC chu lo kalpui zui tawh lo turin hriattir a ni a, thil awmzia zawhfiah a nih hnuin a document kan ko a, chung document te chu en a nih hnuah Sorkar hmasa lam hunah thui tak kalpui a lo ni tawh tih leh sum pawh sanction a ni tawh tih hriat a ni ta a. Mimal, ram neitute leh a leitu inkar thil a nih avangin a chunga rawtna ang hian tunah chuan a nih ang ang a kalpui ni mai tawh se" tiin.

CM hnena File a thlen hma Ni 27.06.2025 ah Lengpui leh Sihphir a ram leina sum chu MizoramRural Bank, Aizawl DC Account ah an lo thun fel der tawh a ni. Sawrkar hmasa hunlaia an lo tih tawh te leh ZPM sawrkar hnu a Revenue Dept in fimkhur thei ang bera a kalpui dan enin a, "A nih ang ang a kalpui ni mai tawh se" tih chu CM tan chuan tih awm tak a ni.

He thilah hian umzui tur tam tak a awm ngei anga, mipui te pawn thudik hriat hi kan chanvo a nih avangin ZPM party chuan CBl chhuitir ngei kan duh a, Revenue Minister kal chhuak ta Pu Lalruatkima Treasurer MNF Gen. Hq leh Pu Lalnunmawia Chuaungo MPCC Senior Vice President te hi CBI in an chhui theih tura FIR thehlut ngei turin kan phut a, kan lo ngaichang dawn a ni.

An thehlut ngamlo a nih chuan eng emaw hlauh an nei ni ah kan ngai ang. An thehluh ngam ngei pawh kan ring a, IAF ram kaihhnawihah mipui ten thil awm dan dik tak kan hriatfiah phah thei dawn a ni.

Uluk taka Document te han chhui leh an indawr tawn dan han en let hian MNF sawrkar lai khan lo ti fel hman ta se, IAF hnenah hian chatuan atan Mizoram leilung hi an lo hralh fel hmak dawn tihna a lo ni a, mipui te pawn kan hre lo rei viau maithei a ni.

Sihphir leh Lengpui ram chungchanga hming lang thenkhat te:

1. Rohmingliana Lengpui area

2. Zoramthanga Sihphir ram Garden Pass No LSC No G72 of 1990 and three others.

(No. F. 14022/327/2019-DC (A) 38-46 Dated 2nd September 2021 from DC Aizawl letter to Defence Estate Officer Guwahati Circle)

Heng bakah hian he thil kaihhnawih hre tura ngaih politician te chu Pu Lalruatkima Ex Revenue Minister, Pu H. Rammawi Ex Planning Board Vice Chairman hian rang zawka hmala turin DC Aizawl a nawr thu kan hmu a, tuna Congress party Senior Vice President ni mek Pu Lalnunmawia Chuaungo hi MNF hunlaia lAF hnena ram hralh tuma hmalak hun lai khan Ni 12-2-2019 to 29-10-2021 chhung (kum thum chhung) Mizoram CS ani a, kha tih hunlaia DC te enkawltu GAD changtu chu Pu Zoramthanga Ex CM hi ni bawk. An ni hian thudik sawi duhse sawi tur an nei hlawm ngei anga, an ngawi ral dawn nge thudik inthup an puang dawn tih chu kan nghak ta thup mai a ni.

MNF sawrkarin ram hralh tura hmalak a lo lak dan himlo em em te:

1. IAF nena an indawr tawnna te hi a pulunga hralh tuma indawrna/outright purchase vek a ni a, Mizoram in inhumhimna kan neih Bengal Eastern Frontier Regulation Act 1873 te, Mizoram Land Revenue Act 2013 te hi sawi lan ani ngailo a, Outright purchase an remtihlohna sawilang miahlo in lAF hnenah hian ram hi hralh an lo tum hle ani. Ka chauha Article 371G aupui nasa em em tu MNF party te hian ram himna sawilang duh miahlo a hetianga hma an lo hi Nationalism kengtu party in ti ngam tur an ni zel dawn em ni? MLARR Act 2016 Dan/Act hnawl tawh pawh kha a tulna angah chuan hman theih a ni tih pawh a hrechiang tu an ni.

2. A tir atang rengin ram lak tur hi tinzawn neisa an ni tih document atang te in a hriat hle a, 2nd August 2018 ah CS Mizoram hnenah lAF ten ram an mamawh thu an thlen a, September Ni 1, 2018 hian Lengpui ram neitu hian CS hnenah ram a neih thu a thlen nghal a, Ni 22nd January 2019 a DC Aizawl in CS hnena lehkha a thawnah phei chuan heng ram pahnih bak hi Aizawl District ah hmun remchang dang a awm loh thu a ziakhial a ni.

3. ZPM sawrkarin thil awm dan a lo hriata a zirchian hnu in MNF in ram hralh a lo tum dan Outright purchase chu a him lohzia hriain, (0utright Purchase hi danah ziah lanna a awmlo) Land Acquisition dan ang thlapa hmalak tha a tih angin hmalak zui ani ta a, tuna lAF te ram lak hi a hawha hawhtir Landlease kalphung anga kalpui tur a lo ni ta a ni. Defence Ministry chuan Form awmsa hmangin Rules 7 hmanga an rawn dil hunah state sawrkar chuan Rules 7 (3) (a) hmangin a hawhtir thei ang.

4. Dan ang taka IAF hnena ram hi hawhtir tur a lo nih tak avangin Lengpui leh Sihphir ram hi DC Aizawl kutah a awm ta ni. Letter No. F. 14011/327/2025-DC (A) L&B/117 Dated 1st August 2025. Pu Lalduhoma kaihhruai sawrkar; mipui sawrkar hi he ram leina thilah hian a kut a fai hle a, kan chhuan em em kan CM Pu Lalduhoma hi kum 10 aia rei CM tura kan vauchher a ni bawk a, he thilah hian a kut a fai tih kan hria a, kut fai lo a ngai kan awm a nih chuan lipse kan ngam a, kei Revenue Minister pawh hian ka ngam a, mipui kuta awm kan ni a, politics inbeihna ringawtah he thil hi tawp lo se kan duh takzet a ni.

Tu te hnenah nge ram man hi a luh tih te, tu te nge mantang ei tih te hi mipui hriat chak zawng tak a ni ngei ang a, hunin a la rawn hai lan ngei i beisei ang u.

Zoram Lalp'an malsawm rawh se.

Kan lawm e.

Sd/-

(B.LALCHHANZOVA)

Chairman, Media Cell

ZPM, Gen. Hq, Aizawl.