Sports Minister-in Japan mi thiamte hnuaia Mizorama sports coach-te intuaitharna tur, 'Transforming Sport for the Next Generation: Developing Decision Makers' hawng

Aizawl | December 15, 2025: Mizoram sports hmelhmang thlak danglam tura hmalakna kal mekah vawiin khan Mizorama sports coach-te intuaitharna tur, 'Transforming Sport for the Next Generation: Developing Decision Makers' tih chu Sports Minister Lalnghinglova Hmar-in Hawla Indoor Stadium, Republic Vengthlangah a hawng a; Japan mithiamten zirtirna an pe ṭhin ang.

Mizoram State Sports Council, Nippon Sports Science University leh JICA ṭang kawpin an buatsaih coach-te inzirnaah hian zirtirtu turin Nippon Sports Science University, Tokyo atangin Prof Masamitsu Ito a lo kal a, NSSU Project Coordinator Tanako Ayako, JICA Senior Representative Eiji Wakamatsu, JICA JOCV (Rugby Coach) Mikinori Hirano leh JICA Additional Lead Project Officer Joyota Rabha ten an ṭawiawm a, December 18 thleng kalpui a ni ang.

Lalnghinglova Hmar chuan, "Khawvel huapa sports lama mithiam leh zirtirtu ṭha kan chang thei hi a lawmawm takzet a, a man pek tur ni se kan pek theih loh turin a thlawna zirtirna a rawn pe thei hi kan lawm takzet a ni," a ti a, coach-te chu ṭhahnemngai taka inzir turin a chah.

Sports & Youth Services Minister chuan, "Zirlai ṭha nei tur chuan zirtirtu ṭha neih a ngai a, coach ṭha kan neih chuan sports lamah hma kan sawn thei ang. Tuna kan awm dan ngai reng a nih hi chuan kan result a ngai reng dâwn a, kan intuaihriam a, hmasawn kan tum a ngai. India-in hma a sawn a, chu hmasawnnaa kan tel ve loh chuan National Games-ah 28-na bawr velah kan tei kan tei reng a nih hi," tiin infrastructure mai ni loin sports coaching chu chawi kan a ṭul thu a sawi.

Lalnghinglova Hmar chuan Sports lama hmasawn turin mi thiamte aṭanga zirtirna kan mamawh a, khawvel huap mithiam chah chhuah chu chhawr ṭangkai turin coach-te a chah.

JICA, India Senior Representative Eiji Wakamatsu leh a thawhpuite an lo kal bawk a, JICA-in Mizoramah hna hrang hrang a thawh tawh thu leh tun ṭum hi Sports lama thawhona hmasa a ni tih sawiin Pu Wakamatsu chuan, "Mizoram Sports Minister-in ṭhahnemngai takin a bei a, vawi eng emaw zat kan meeting a, tunah a tak a chang ta hi a lawmawm hle a ni. Mizoram hian sports lamah pawh theihna sang tak a nei a, kan thawhona hmangin hma kan sawn ngei ang tih kan beisei," a ti a; JICA chu Sports lama thawkho tura a inhawn reng thu a sawi.

Vawiin programme hi MSSC Secretary Henry C Lalrawnkima chuan a kaihruai a. Senior Sports Promotion Officer Albert Lalnunpuia'n he programme atana inbuatsaihna chungchang report pein, Sports Promotion Officer H Laldinsanga, chuan lawmthu sawiin hun a khar a ni.