LADC-ah MNF leh ZPM-in sorkarna an siam dawn!

Aizawl | Dec 15, 2025: Lai Autonomous District Council (LADC) inthlanpui neih zawh takah MNF leh ZPM-in sorkar inṭawm an siam siam dawn.

LADC-ah party mala sorkarna siam thei an awm loh avangin ZPM leh MNF-ten LADC-ah Lairam Legislature Party (LLP) an din a, T Zakunga, ZPM chu Chief Executive Member tura ruat niin, Deputy CEM tur chu MNF lamin an ruat ve thung ang. Party pahnihte hian LADC-ah sorkarna ngelnghet tak siam turin inremna an siam a ni.

LADC-ah hian ZPM Party atangin mi paruk - T. Zakunga, LR Dingliana Chinzah, Lallura Chinzah, T Lalchhuanvawra, Dr K Lalchhuanpuia leh K Lalramzauva te thlan tlin an ni.

Lairam legislature party (LLP) leader atan lungrual takin Pu T Zakunga (ZPM legislature party leader) a thlan ani. Deputy Chief Executive Member, Chairman leh Executive Members post pathum (3) hi Mizo National Front(MNF) legislature party in an chang ang a, Zoram people's Movement (ZPM) Legislature party in Executive members post panga (5) an chang ang. A bak office holder post-te hi House leader leh MNF legislature party-te inbiakrawnna ang a hnawhkhah tur ani ang.

LADC-a Lairam Legislature Party leh ZPM Legislature Party-a leader ni bawk T Zakunga chuan thu sawiin, “Mizoram kaihruai turin ZPM sorkar chak tak Pathianin min pe a, chutih laiin LADC-ah ZPM-in MDC member 6 chauh kan nei hi keini pawhin tlem kan tih rualin; Pathian remruatah kan ngai a ni. Inthlan zawhah sorkar din tumin Congress party nen ZPM PAC hmalaknain kan inbe zui a, uluk taka kan hotuten an ngaihtuah hnuah MNF Legislature party nen sorkar ngelnghet zawk din theih a nih beiseiin inremna kan siam ta a ni. LADC-ah sorkar ngelnghet a awm theih loh avangin hmasawnna kawngah pawh kan thuanawp phah hle niin kan hria a; chuvangin, lungrual takin kan hotute kaihhruaina hnuaiah sorkar thar din turin Governor hnenah vawiin tlai hian sorkarna kan siam theih thu kan thlen nghal dawn a ni,“ a ti bawk.

12th LAI AUTONOMOUS DISTRICT COUNCIL AH ZPM LEGISLATURE PARTY LEH MNF LEGISLATURE PARTY-TE THAWHHONA THUTHLUNG

1. 12th LADC term-ah keini Zoram People's Movement leh Mizo National Front te'n LADC sawrkar ngialnghet tak siam tur a thawhho tha kan ti a, kan legislature party hming atan lungrual takin Lairam Legislature Party (LLP) vise tha kan ti.

2. Lairam legislature party (LLP) leader atan lungrual takin Pu T Zakunga (ZPM legislature party leader) a thlan ani. Deputy Chief Executive Member, Chairman leh Executive Members post pathum (3) hi Mizo National Front(MNF) legislature party in an chang ang a, Zoram people's Movement (ZPM) Legislature party in Executive members post panga (5) an chang ang. A bak office holder post-te hi House leader leh MNF legislature party-te inbiakrawnna ang a hnawhkhah tur ani ang.

3. Lairam Legislature Party hi Laifate kawng hrang hrang a hmasawnna kan neih theihna tur a thawhhona a nih angin, Lairam Legislature Party sawrkar hian Lai tawng hmasawnna turin nasa takin hma ala ang a, official matters-ah a theih chin chin a Lai tawng leh English hman tur a ni.

4. 12th LADC term chhung hian ZPM legislature party leh MNF legislature party hian lairam hmasawnna tur leh Laifate tan sawrkar ngialnghet neih tul kan tih avangin, Lairam Legislature party ah thawhhona thuthlung siamin kum 5 chhung atan sawrkar nghet tak a din theih nan lungrual takin heng a hnuai amite hian kan hming kan ziak e