Aizawl | Dec 15, 2025: Thingtlang tlangval Aizawl khawpuia mi Two Wheeler Taxi khalh-a dam khawchhuah sual mek, Tlangval kum 27 mi Lalhmachhuana chuan a hmaa a tawn tur hre hauh lovin Dec 5, 2025 zirtawpni zan chuan Aizawl atangin Sairang-ah passenger a dah a. A rilru-in, "he ka tlanna hian petrol ka thun ang a, vawiina ka thawhchhuah dang hi chuan chumi khami a hman tur chu ka nei thei tawh ang," tih te pawhin a suangtuah pah ve rauh rauh ngeiin a rinawm.
.jpg)
Mahse, suangtuah ang hian khawvel a kal vek lova, Lalhmachhuana tan ngei pawh hian a ni. Zan 8:30 bawr vel a ni a, a rawn haw lam chu Eeco van nen an insu a, amah sutu lah chu a tlan tlang daih a, a thianten buaipuiin, a scooter chhia chu an kalsan a, damdawi inah an lut a, chhiat tawh a karah a kut zungte ding lam ruh a la tliak zui a, sum thawhchhuahna tur induhthawh lai nen hun lo a ti viau ngeiin a rinawm. Chu chu, "thla khat em pawh in luaha kan khawsak hmain chhiat ka tawk a," a tih hian a tichiang awm e.
December 6-a an scooter kalsan an zuk en leh chuan, scooty battery an lo ruksak zui a, mi ta khalhin a inhlawh a, a accident a, a kut ruh a tliak a, chutah, a scooty battery an lo suksak leh zui a. Chumi ni vek, inrinni tlai chuan FIR an thehlut a.
Chu a chhiat tawhna chu nu pakhat hian lo hriain, a lainat thu leh puih a duh thu hrilhin, Instagram kaltlangin a video an post-na Bawngkawn Two Wheeler Taxi Riders account-ah a be ta a, an no te pein, a pui ta a ni.
Hemi chungchang hi Lalhmachhuana chuan, "sing thum lawih min rawn GPay a, mak ka ti a, ka lawm em em a, ka thiam ang tawkin lawmthu te ka sawi ve a," a ti a, "khatiang zat zat min lo thawn kha mak ka ti tak zet a, ka hamhaih zawk hial a ni," tiin a beisei loh lutuka tama puitu a tawng chu mak a ti a, a hamhaih hial thu a sawi.
Lalhmachhuana (27) hi Rinpuia leh Vanlalzami te fapa niin, unau pali an ni a, a naupang ber dawttu a ni. Khanpui khua niin, Tuikual North-ah mahnia in luahin a khawsa a, "thla khat em pawh in luaha kan khawsak hmain chhiat ka tawk a," tiiin a sawi. Two Wheeler taxi hi 2024 October vel atangin a khalh tan thu a sawi bawk.
Two Wheeler Taxi driver puitu hi model hriat hlawh tak ni thin, Mami Dec Ralte tia hriat hlawh Tlangnuam Vengthlang mi, 'Lal Tlanhlui Ralte' a ni a, "Pathian atangin Malsawmna ka dawnte ka pek let ve theihnaah ka ngai a, kan neih vang emaw hausak vang ni lovin, mi hriat hlau tak sia kan pek, rin loh tak maiin a rawn darh ta a a ni. A hnu lawkah dam lovin damdawi inah ka awm leh nghal avangin an lawmthu sawina post pawh ka lo hmu lawk lova. Ni lo se, mi hriat ka duh lo zawk,"a ti a, a chhan sawiin, "a bei tham si a, mi nuih kan tihzat te a hlauhawm a, a lo darh ta si a. Mahni insit a na duh hle!" a ti.
Sawi chhunzawmin, "Mi hausa leh nei bik ka ni lo. A chhiat tawh dan ka'n hmuh khan ka lainat tawp a, a battery te an ruksak zawng zawng nen, sum thawhchhuah induhthawh lai tak maia khatiang chhiatna a tawk kha ka lainat a, ka pain lirthei khalha, ka nu leh pain thi leh thau pawlha min lo enkawl seilen dan te ka ngaihtuahin kan chanah ka inchan a, ka lainat a, ka khawngaih em avanga pe ka ni. Neih avang emaw neih chuang liama pe ka ni lova, mahse, fel loh leh tling lo tak chungin, ka eizawnna a hlawk poh leh mi dang tana malsawmna ni turin ka intiam a, chumi hlen nana ti ka ni," a ti bawk.
"amah kha ka hmelhriat a ni lo hrim hrim a, Two Wheeler Taxi hovin an post ka lo hmuh a, ka lainat em avanga pui mai ka ni," tia sawi chhunzawmin, a nazawng a tanpui bik loh thu te sawiin, rim taka a thawhchhuah atanga pui ve tho a nih thu Lal Tlanhlui Ralte chuan a sawi bawk.
Lal Tlanhlui Ralte hi 'Carine Nail and Lash Bar' neitu niin, a sumdawnna hi Upper Khatla, MG Road, khatla bus stand bulah hian a awm a, hetah hian thawhrimna zawng zawngah hlawkna a awm tih changchawiin taimna nen theihtawp chhuahin a thawk thin a ni.
"A tir chuan, Nail Extension leh eyelash extension te zirin, mi ina panin bul ka tan chhova, mite thatna leh Pathian zarah hma ka sawn ve zel a, tunah erawh, kan hnuaiah zirlai leh thawktu an awm ve tawh a, kan product te pawh state pawnah thleng thleng kan thawn ve tawh a ni," tia sawiin, 'Carine Nail and Lash Bar' hian, Eyelash extension, Nail extension, Lip colouring, Hydrafacial, Bbglow, Eyelash lifting te an tih theih bakah a zirna (training institution) an kalpui a. Hetiang an thil training tir theih zawng zawng hi a bungrua-te hi wholesale in an pe a, a mal pawhin a lei theih vek a ni.
An brand 'Carine Nail and Lash Bar' hmingin product an siam a, kan bungrua te hi Mizoram chhung hmun hrang hrang bakah ram pawn thlengin miin an la chhawng a, an zuar chhawng thin bawk a ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
(Feedback at: admin@exploremizoram.com )
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: