- James Ramdinmawia
Mizoram Chief Minister-in Mizoram State University (MzSU) chu Lunglei-a dah a nih tur thu a puang ta thut si a. Lunglei-ah chuan dah ni ta se a nghawng tur hrang hrangte i thlirlawk ang u hmiang.
1. Lunglei leh chhim lam mipui tan malsawmna nasa tak a ni ang :
A ţhatna lam han sawi hmasa ila. Lunglei-a MzSU dah a nih chuan Lunglei leh chhim lam zirlai, ram tana michenfakawm tak tak la ni tur, chhungkaw harsatna avanga Aizawl leh phai lama lehkha zir chhunzawm thei lote’n anmahni kawtkai ngei-ah Post Graduate (MA leh a dang dangte) an zir thei ve tawh ang.
Professor leh mithiam rualin Lunglei khawpui an luah dawn a, hemi bakah University-a hotu lian te, Officer leh Staff tam takin an ţhutchilh dawn. Lunglei tan chuan a hlu hle dawn a ni. MzSU Headquarters Office leh Campus din a ni ang a. Clustered College turte thuam ţhat a ni bawk ang a. Nasa takin Lunglei-in Infrastructure lamah hma a sawn phah dawn a ni.
National/International Seminar, Symposium, Workshop, etc. Lunglei-ah nghah a ni fo dawn a. State dang leh ram dang mithiamte’n Lunglei an rawn tlawh zut tawh mai dawn. University hmingţha tak a nih chhoh phei chuan State dang leh Foreign aţang pawhin zirlai a hip ang a. Tourism lam thleng pawhin Lunglei-in a hlawkpui ang a, chu chu Lunglei leh a chhehvel mipui tan a hlu dawn em em a ni. An Economy pawh nasa takin a ţhan phah ang.
2. Sorkar inbuatsaihna a nghawng dan tur :
The Mizoram State University Act, 2025-in Provision a pek angin Mizoram Sorkar chu MzSU din turin a inbuatsaih mup mup a. MzSU Headquarters Office tur tihfel a ni tawh a. Clustered College tur hriattirna pawh Mizoram Sorkar Higher & Technical Department chuan dt. 10.10.2025 khan Notification a chhuah tawh nghe nghe a ni.
Lunglei lama MzSU dah a nih leh dawn tâk si-ah chuan heng inbuatsaihna awm tawh zawng zawng hi a bul aţanga ngaihtuah ţhat leh vek a ngai dawn a. A Act hrim hrim pawh siamţhat leh a ngai dawn bawk a. Sorkar tan a luhaithlak dawn hle a ni.
3. Clustered System-in a nghawng tur :
Lunglei lam Demand Committee-in Lunglei-a Mizoram State University dinna tura Clustered College-a hman theih ni-a an sawi ţhenkhat hman chi a nih loh thu Article hmasa lamah kan sawi tawh a. Lunglei khawpui chhunga sum sen belh lutuk ngai lova Clustered College tana hman theih chu Lunglei Govt. College leh Mizoram Engineering College chauh a ni. Govt. J. Buana College Campus thar erawh develop chawp ngai leh Building sak chawp ngai a la ni.
Clustered College atan hian Govt. Hnahthial College, Govt. Siaha College, Govt. Lawngtlai College leh Govt. Kamalanagar College te sawi rik a ni a. Hengah hian School ţhenkhat dah ni ta se, nasa takin Administration a nghawng ang. Deans’ Committee leh Head of Department Meeting vel koh a hautak viau ang.
Chu mai bakah MzSU hian MZU a el chhoh a ngai dawn a. MZU hi NIRF leh IIRF Ranking-ah te a sang tawh mai si a, Infrastructure leh Facilities a nei changtlung tawh bawk si. Hemi el pha thei tur hian Zirtirtu ţha, Mizoram chhung leh State pawn aţang pawhin mithiam tak tak kan chawk luh a ngai dawn a, Facilities ţha kan neih a ngai bawk. Lunglei, Siaha, Lawngtlai, Hnahthial leh Chawngte te-a awm duh tur mithiam kan hmu zo ang em? State dang aţang leh Foreign aţangin heng hmunah te hian MA zir duh kan hmu zo ang em? University Quality lo zet hi kan din palh ang em? Ngaihtuahna a tithui viau.
4. Under-Graduate Students Enrolment leh Zirtirtute dinhmun :
Mizoram Sorkar Higher & Technical Education Data-a a lan danin Lunglei leh Hnahthial District chin chhim lam zawngah College zirlai mi 2,433 an awm mek a. Hmar lam zawngah zirlai mi 10,425 (PUC tel lovin) an awm mek. PUC zirlaite tel phei chuan hmar lamah zirlai 12,800 chuang an awm dawn tihna a ni a. Hmar lam College-a zirlai tam tak hi chhim lam mi an ni tih erawh kan hriat tel a ţha ang. Chutih rualin heng hmar lam zirlai rual hian MA zir turin Lunglei, Hnahthial, Lawngtlai, Siaha leh Chawngte te an va pan vang vang duh ang em? Tin, chhim lam zirlaite zingah ngei pawh MA zir tur chuan Aizawl leh phai lam àwn zawk an ţhahnem viau-in ka ring a. Post-Graduate zir tur hmu zo mang lo hian MzSU hi kan va din hluai ve thei tlat. Chu chuan University Quality leh a hma hun thui takin a hril dawn a ni.
Tin, zirlai kaihnawih leh College kaihnawihah hmar lama zirlai tam zawk hian MzSU dawr dawn se, Lunglei an pan vek a ngai dawn a. Chu mai bakah University Sports (Inter-College Sports) leh University Event hrang hrangah a tam zawkin a tlem zawk awmna an pan ziah a ngai dawn bawk. A buaithlak an ti ve viau ang.
Mizoram University hnuai-ah hian Affiliated College 39 a awm mek. Chung zinga pariat (8) chu Lunglei leh Hnahthial District chin chhim lama awm a ni a. A dang 31 chu hmar lama awm vek an ni. Heng Affiliated College tam zawk awmna hmuna MzSU Hqrs. dah lova a tlem zawk awmna hmuna dah daih chu a tam zawk hian ‘fair lo’ an ti ve viau mai thei.
Tin, Clustered College lo zawng Constituent College an nih tawh dawn avangin Mizoram Sorkar hnuaia College zawng zawngte State Sorkar hnuaia awm tawh lovin MzSU hnuai-ah an awm tawh dawn a. Zirtirtute leh Non-Teaching Staff zawng zawng pawh MzSU hnuaia thawk an ni tawh dawn. An Service chungchangah leh College pawipawngah MzSU thuneitute dawr a ngaihin Lunglei lam an pan vek a ngai tawh dawn a ni.
5. A enkawlna senso a hautak dawn :
Exam Conduct, Central Evaluation System (Exam Paper Checking), Question Setting, Question Moderation zawng zawng hi University Hqrs.-ah tih vek a ngai a, chutah chuan University leh College zirtirtute an kalkhawm a ngai ţhin. Henga kalkhawm tur tam zawk hi hmar lama awm an nih miau avangin an TA/DA a hautak dawn. MZU Finance Officer, Prof. Vanlalchhawna sawi danin MZU hian kum khata MZU leh a hnuaia Affiliated College zawng zawng Semester hnih (2) Exam a conduct-na-ah hian Rs. 4-5 Crore te a hmang. Chu chu zirlaite Exam Fee pekin a daih ţawk ţawk a ni. MzSU Hqrs. Lunglei-a a awm chuan chu ai chuan a senso a la sang fe tura ngaih a ni, zirtirtu tam zawk hmar lam aţanga an zin phei ţhin a ngaih dawn avangin. Zirlaite Exam Fee tihsan vak a ngaih phah mai thei. Chu chuan zirlaite tan phurrit a siam dawn a ni.
Zirtirtu lakna-ah te, Ph.D Final Presentation (Viva Voce)-ah te University dang daiha mi External Expert an rawn ţhut te a ngai ţhin. Chung zawng zawng senso chu MzSU tum tur vek a ni. Airport to Lunglei Transportation hian a senso a tisang hle dawn tih kan hriat a ţha. Chumi piah lamah an hun leh tha a hek dawn avangin an tan rawn kal a chakawm loh viau thei bawk.
University-ah hian Committee leh Body pawimawh tak tak a awm a. University Court te, University Council te, Academic Council te, School Board eng emaw zat te, Finance Committee te, College Development Council leh thil dang dang a awm ţeuh a ni. Heng Body hrang hrangah hian Member zingah Dean te, College Principal te, Professor rual te, College hrang hrang aiawh zirtirtute, State Sorkar aiawh te, External Member te an awm a. Meeting chi hrang hrang a tam em em a. Chuta Member-te TA/DA chu a hautak em em a ni. Heng Committee leh Board Member tam zawk hi hmar lama awm an ni ngei ngei dawn a. Lunglei-a MzSU Hqrs. dah a nih hian Meeting senso a san phah viau dawn.
Eastern Campus leh Western Campus diltu an awm belh leh ta a. Campus hran din hi a hautak lutuk, kan tlin lo. Tin, Nagaland University-in Campus hrang hrang a neih thu te kan sawi lang fo a, hma an sawn loh em khi.
Sawi tawh angin National/International Seminar, Symposium, Workshop, etc. Lunglei-ah nghah a ni fo dawn a. State dang leh ram dang mithiamte’n Airport aţanga hla tak Lunglei hi an rawn pan duh ang em?
NIT te pawh Thenzawl-a awm tura tihfel vek tawh kha Ministry of Education lamin uluk taka an zirchian hnu-ah Airport aţanga a hlat lutuk avangin a hmunhma zim zawk Lengpui-ah an sawn ta daih a nih kha.
Post-Graduate Course hlawh tling taka hawng tawh Govt. Aizawl College (MA Edn.), Govt. Hrangbana College (M.Com),
Govt. Aizawl West College (MA History) leh IASE (M.Ed. bakah Ph.D thleng zir theih) te rual khan Lunglei Govt. College pawh PG Course hawng tura tih an ni a. Mahse chhuanlam eng eng emaw avangin an hawng ve ta lo a nih kha. Lo hawng ve mai se chuan Lunglei-ah MA zirna a awm daih tawh tur a ni a.
A tawp khar nan chuan MzSU Hqrs. hi Lunglei-a dah a nih chuan chhim lam mipui tlemte-in an ţhatpui ang a. A State pum huap erawh chuan kan ţhatpuina aiin kan ţhatpui lohna lamin a buk rit zawk. A enkawlna senso a hautak zawk dawn bakah mithiam tak tak chherchhuahna University Quality sang tak kan din theih loh phah ang tih a hlauhawm.
Eng nge i ngaihdan ni ve le?
**************
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: