"Fai leh thianghlim tur hian Sanitation Committe-te kuta inngah ngawt tur a ni lo," ~ Aizawl Dy Mayor

Aizawl | Dec 2, 2025: Dinthar Local Council hnuaia Committee, Dinthar Sanitation and Beautification Committee hmalaknain nizan, ni 1.12.2025 khan Dinthar Local Council House-ah kum 2025 chhunga vengchung faina leh thianghlimna lama ti thate hnenah chawimawina leh lawmman sem a ni.

He hun hmanpuitu, Aizawl Deputy Mayor leh AMC Ward XII Corporator, R Thanglura chuan, "Fai leh thianghlim turin Sanitation Committe-te kutah chauh kan innghat tur a ni lo va. Chhungkua, mi mal, kohhran, tlawmngai pawl leh tute mai pawh hian kan mawphurhna a ni tih hriat a tul a. Tifaitu kan ni thei lo anih pawhin tihnawktu kan ni tur a ni lo," a ti a.

"Fai leh thianghlimna kawngah Mizoram hmel pholan mek zel a nih lai hian Aizawl pawnlam te thawhrimna chauh chhuan tur kan nei a, khawpui lamin tan kan lak thar deuh deuh a tul a ni," a ti bawk. "Rel-in Mizoram laili a rawn thlen hnu hian hnamdang khualzin an pung chho mek a. Aizawl khawpuia veng tin hian Khawpui thawmreh ringawt hmuh tir lovin khawpui fai leh thianghlim kan hmuh tir a tul a ni," tiin "Ei leh in, incheina leh khawsakna hmun fai leh thianghlim neih hi Zofaten kan tlin a ni," a ti.

Lawmman semna inkhawm hi Lalhlupuia Sailo, Dinthar Local Council Chairman-in a kaihruai a. Upa Lalrambeiseia'n hunserh hmangin Zoramthanga, Dinthar Sanitation and Beautification Committee Chairman-in thu a sawi bawk.

Saidingliana Sailo, Secretary leh Lalhmingmaka, Treasurer-te hnen atangin report ngaihthlak a ni a. He hunah hian thlanmual leh khawlai tifai thinte leh Dinthar Sanitation and Beautification Committee section hrang hrang fai lawmman sem a ni.

Section fai lawmman dawngtute :-

Pakhatna : Taitesena Section

Pahnihna : Khuangchera Section

Pathumna : Vanapa Section, Zampuimanga Section, Chanwgbawla Section

Lawmman leh chawimawina hian thuziak leh tangkafai a keng tel a ni.

Dinthar Sanitation and Beautification Committee hmalakna hian plastic hmanraw hlui, bottle leh thildangte lei thin a ni a. Hei hian Vengchhunga faina kawngah kawngro a su hle a ni.