Govt Mizo High School buatsaih 'Thul 2025' hawng; Dec 5 thleng awh dawn

Aizawl | Dec 2, 2025: Govt Mizo High School buatsaih 'Thul 2025' chu vawiin khan School Education Director Angela Zothanpuii’n a hawng a, Literature club zirlaite thu leh hla ziahna Thulkhung tih lehkhabu a tlangzarh bawk.

School Education Director Angela Zothanpuii chuan 'Thul 2025' hawnnaah hian thusawiin Govt Mizo High School chu sorkar enkawl zikul zinga chhuanawm ber pawl a nih thu te, zirtirtu pawh chhuanawm tak tak an nih thu a sawi.

Director chuan tun hnaiah room chhung boruaka thil nawi zirchiang thei 'Hospisafe' ZMC&H a present tur an siam chhuak thei chu chhuanawm a tih thu leh zirtirtuten hetiang tithei tura zirlaite an kaihruai thei chu lawmawm a tih thu a sawi a, hetiang zirtirtu tha an awm hi zirlaite tan pawh lawmna tur a ni a ti a. Hriatna leh thiamna kan neihte hi mite hmuhah a eng tur a ni a, chutiang tih theihna Thul 2025 a awm chu lawmawm a tih thu a sawi.

December 2 - 5 chhunga neih tur, 'Govt Mizo High School Thul 2025'-ah hian zirlaite kutchhuak thil chi hrang hrang mipui en theih tura pho chhuah a ni. Zirlaiten an thiam thil leh kutchhuak chi hrang hrang an entir bak hian, Adventure - Zip lining, food stall, indigenious entertainment, Arts & craft, Beauty & wellness, house of horror leh Career guidance te neih a ni.

Govt. Mizo High School Thul 2025 hawnnaah hian Govt Mizo High School Pipe band ten rimawi kalrem hmuhnawm tak an entir a, Cultural club ten lam an entir bawk.