SIAMTU LEH CHHANDAMTU CHE CHU RING RAWH

  Isua Tih Danin

-Rick Warren

-Nov 4, 2025

“Thinlung takin Lalpa ka chawimawi a. Min chhandamtu Pathian chungah ka lâwm êm êm a ni." [Luka 1:46-47]

Pathian ngaihtuah chhuah i ni a. Pathian hmuhchhuah i ni a. Pathian kutchhuak i ni.

Nangma insiam i ni lo va. Pathian siam i ni. Pathianin a hriat bak che chu tuman an hre lo che. Awmze neiin a duang che a, a ruahman che a, a siam che a ni.

A siam ringawt lo che a, a chhandam bawk che a ni.

Chhandamna i mamawh a, a chhan chu Pathian siam ni mah la, tihluihnain a nawrlo che a ni. Chuvang tak chuan nangma duhdanin i khawsa a. I ruahmanna angin i kala i buai zo tawh a ni. Sualah i tlu a. Chuvang chuan i sualna avanga chhandam tur leh thi turin Isua a lo tir a ni.

Isua chu mi zawng zawng nung dama awm tawh phawt chu aiawha an sual man bat tlak turin Pathianin a tir a ni. Isua nu, Mari pawh khan, Pathian chu Chhandamtuah a pawm a ni. Pathianin Mari hnenah vantirhkoh a tir a Isua a pai tur thu a hrilh khan, Pathian ruahmanna chu Mari chuan a pawm a - a chhan pawh kan hmuh a.

“Thinlung takin Lalpa ka chawimawi a. Min chhandamtu Pathian chungah ka lâwm êm êm a ni." [Luka 1:46-47]. Mari chuan, “Pathian chuan min siam satliah a ni lo va’ min chhandam a. Pathian chu zui ngei ngei a tul avang emaw a hreh taka zui ka ni lo. Phur takin, tha tho takin, hlim takin ka zui a. Ka lawm a ni!”

Chu dinhmun atang chuan Mari chuan a damchhan a hrechiang a; Pathianin a duanchhan a inhrechiang a. Pathian ruahmanna zawm chu a thlang a, Chhandamtu chuan a hruai zel ang tih a ring a ni.

Kan nun kan en chuan, mi tam zawk te hi chu Pathian awm ringlo ang maiin an khawsa a ni. An chhandamna atan Pathian an pawm a, nimahsela, hetiang hian an ngaihtuah,“ka kalchhuak thei a, ka duh dan danin ka nung thei.”

A ni em? Pathianin i duh dan dana nung turin a dah che i innring em? Ka ring lo a ni.

Pathianin ama tan a siam che a. A siamtu che leh chhandamtu che aiin i nun khaw nawmna tur chu i thlang zawk dawn em ni? 

Ngaihtuah zui atan

* Nangmah siamtu che tho hi chhandamtu che a ni. Chu thutak chuan nangmahah awmzia engnge a neih? 

* I nun i thlir hian eng kawngah te nge Pathian awm ringlo ang hiala i khawsak le?

* Nangmah siamtu che nge Chhandamtu che zui awlsam zawk ang le? Engvang nge?

Isua chu i Chhandamtu niin i ring em?

Pathian ta i ni em? Chhandam i ni tawh em - ila ni lo anih chuan - a kutah i nun pumpui hlan rawh. Thu lawmawm hrilh tur che ka nei! Pathian nena inzawmna i neih chuan buaina te pawh i chingfel thei a. Nun bul tan rawh la, hetiang hian tawngtai rawh le:

“Aw Lalpa, hriat che ka duh. I aw hriat ka duh. Ka nun i duh tih hriat ka duh. A vai chuan ka hrethiam vek lo, nimahsela min siam avang te, awmze neia min duan avang te leh min hmangaih avang tein ka lawm e. Krawsah ka sualnate zawng zawng rul tura Isua Krista i rawn tirh avang leh  ka lawm e. Min ngaihdam avangin ka lawm e. Nangmah hriatna leh i aw ka hriatna daltu zawng zawng te min hmuhtir la. I hnenah inpuan ka duh a ni. Pathian chhungkuaah min pawm ve la, vawiin atang chuan nangmah rin leh zui che hi ka duh e. Khawngaihin i awm a ni tih min hriattir la, i aw min hriattir ang che. Isua hmingin ka dil a che. Amen.”

I tawngtai thei anih chuan, Rick@PastorRick.com ah hian minlo hriattir la. Isua nena nun i hman theihnana tul leh pawimawh a thlawnin ka lo pe dawn che a ni.

[Lettu: Sangpuia]