Nov 13 - 15 chhungin Leitlangpui Music Festival 2025 hmang dawn

Lunglei | Nov 4, 2025: Leitlangpui Music Festival (LMF) 2025 Working Committee chu vawiin khan an Chairman, Lunglei District Bawrhsap Navneet Mann hovin Lunglei DC Conference Hall-ah ṭhu khawmin, inbuatsaihna hrang hrang an thlir ho.

Working Committee Secretary & Lunglei Municipal Council (LMC) Chief Executive Officer (CEO) Malsawmtluanga'n committee hma lakna report a pe a. Mawhphurhna nei department hrang hrangte hma lak chin report ngaihthlak niin, event management agency (EMA), Brighter Co. leh BBY Animals lam aṭangin Kut inbuatsaihna report ngaihthlak a ni bawk.

Leitlangpui Music Festival 2025 hi November ni 13 - 15, 2025 (Ningani-Inrinni) chhungin Pukpui Kawmzawlah buatsaih tura ruahman a ni a. Zai, lam, hnam thil leh kut them thiam thil pho chhuahna, thuam leh ei leh in chi hrang hrang zawrhna leh intihhlimna chi hrang hrangte buatsaih leh tura ruahman a ni.

LMF buatsaih turah hian PWD lam chuan a panna kawng leh a hmunhma siam rem hna thawk mekin, P&E leh PHED lamin eng leh tui hnianghnar taka pek a nih theih nan hma an la a. A panna kawng leh a hmunhmaa lirthei leh mihring chet vel dan leh ven himna atan District Police te'n ruahmanna siamin, lirthei hunna tur bik hrang hrang an ruahman fel tawh bakah, kawng dunga duty turin beat post 20 an ruahman bawk a. DC Office leh LMC bakah, department leh tlawmngai pawl hrang hrangte'n Kut inbuatsaihna hrang hrang kalpui mek bawkin, Kut huna Medical duty ruahmanna te, Magistrate leh Disaster Quick Response Team (QRT) duty tur ruahmanna te, DRDO, DUDO leh C&I hnuaia SHG leh entrepreneur-te leh ODOP stall ruahmanna te, DLSA leh Police te'n Legal Awareness Campaign an kalpuina tur ruahmanna te sawi ho a ni bawk.

Leitlangpui Music Festival hawnna hi November ni 13 tlai dar 3-ah Health & Family Welfare Minister Lalrinpuii hova hman tura ruahman a ni a. Kut chhung hian a hmunah hian ZOHANDCO Exhibition kalpui pah tum a ni bawk a. Kut ni hnih ni, November ni 14-ah Leitlangpui Music Festival puala Leitlangpui Band Contest 2025 top 10 chin inelna leh final buatsaih a ni dawn a. Top 3 chin hi December ni 12 - 20 chhunga Aizawla Winter Festival buatsaih turah an inlan nghal ang.

LMF 2025 hi ni thum chhung hian ni tin chawhnu dar 1 aṭanga zan dar 9/10 vel thleng hawn niin, item hrang hrang kalpui ṭhin a ni dawn a. Working Committee chuan mipuite Leitlangpui Music Festival chhim ṭheuh tura sawmin, bawlhhlawh thehthang mai mai lo tur leh hawihhawm leh hlim taka Kut hmang turin Kut chhim turte an ngen bawk.