"Mizoram hi eirukna tlemna ber pahnihna a ni, Corruption leh rukrukna lam reng reng min dopui turin kan thalaite ka sawm che u," ~ CM Lalduhoma

Siaha | Nov 4, 2025: Mara Students Organisation (MSO) chuan vawiin khan an kum 60-na champha (Diamond Jubilee) lawmna an buatsaih a, Chief Minister Lalduhoma chuan khuallian niin a hmanpui. MADC CEM M Laikaw chu khualzahawm a ni.

MSO Office-ah Jubilee lungphun leh Jubilee hall hawnna a neih hnuah Govt. Siaha College Seminar Hall-ah a lawmna inkhawm buatsaih a ni.

He hunah hian Chief Minister chuan, Mara Students' Organisation te lawmpuina hlanin, MSO chu Mara fate tana pawl tangkai, thalaite kaihruaitu, hnam huikhawmtu, Zohnahthlak unau dangte nena inpawhna tha kengkawhtu a ni a. Zirna lamah Mara thalaiten hma an sawn theih nan a thawhhlawk hle thin, a ti a. Lawmpuina hlanin an kal zelna turah duhsakna a hlan.

Marate chu zo hnahthlak an nihzia sawiin, Prof. Federic K Lehman, Illinois University pawhin a lehkhabu “The Structure of Chin Society – 1963” ah, “Lushai leh Lakherte hi thlah khat, chuahna thuhmun an ni a, hming hran inphuah mah se ‘Chin’ ve ve an ni”, tiin a lo sawi tawh a. Mara-te hi Zo hnahthlak dik tak, Zohnahthlak dangte ang bawk a Chhura thawnthu nei, Lusei tawng nena tawngkam thuhmun leh sawi dan inang tam tak nei a ni, a ti.

Chief Minister thusawi langsar:

Kan unau Mara leh Laiten Autonomous District Council in nei hi a hlu hle a, in zia, tawng leh tihdan venhimna atan leh hmasawnna tluantling neih nan lo hmang ngei rawh u.

Zirna hi hmasawn zel tura kan inchher hriamna a nih angin zirna hi ngaihlu hle ang u. Mara thalaite hi State Level Competitive Exam-ah in titha thin a. Zirna in ngaihlu tih a hriat a ni. Mizoram level-a duhtawk mai lovin India level-ah pawh rawn lang zel rawh u.

Zirna lama hma kan sawn zel theih nan kumin kum kal mekah New Laty leh Lopu-ah Rs. 145 lakh man ve ve Secondary School building sak a ni a; Theiri-ah Rs. 111 lakh man Higher Secondary School building sak a ni. Tipa V-ah Rs. 188 lakh man Hmeichhe Hostel sak a ni, a ti.

Kan zirlaite leh thalaite tan sorkar pawhin hma a la nasa a, kan sorkar tirh atanga kumin August thla thleng khan sorkar hna thar 515 kan siam tawh a, hnaruak hnawhkhah phalna direct recruitment atangin 2087 leh Limited Departmental Exam kaltlangin hna 532 hnawhkhah phalna kan pe tawh a ni.

Sorkar hnathawh tum lo te tan pawh Bana Kaih Scheme hmangin an thiamna leh theihna zawna eizawnna bul an tan theihna tur kan duang a. A thawh hnihna kalpui turin kan inbuatsaih chho mek a ni.

Tun hnaia zirchiangtu pakhat chuan Mizoram chu India rama eirukna tlemna ber pahnihna a nih thu an sawi a, a chhinchhiahtlak hle. Corruption leh rukrukna lam reng reng min dopui turin kan thalaite ka sawm che u a ni. Eiruk sum atanga lei, thil reng reng hi chu duh lo ngam ila, kan nu leh paten an eiruk atanga an lei a nih chuan eng anga thil tha pawh ni se, i hnawl ngam ang u.

Ruihhlo hi hmuh a lo awlsam a nih pawhin lo hnar rawh u. Mi tam takin an tichhin a, a bawihah an tang zui thuai a, an engkim a chhuhsak thin.

Ziak leh chhiar thiam vekna state hmasa ber kan ni a, khualzin hipluh lama India hmarchhaka hmasawn nasa ber kan ni bawk.

Kan ramin hmasawnna a hmu chho zel a, hmachhawp tam tak kan nei bawk. Heng hmasawnna tharte chhawr tangkaitu ni tur hian kan thalaite lo inbuatsaih sauh sauh ang che u, tih te an ni.

M Laikaw, CEM, MADC pawhin thu sawiin Mara Students Organisation te lawmpuina hlanin, an kal zelna turah duhsakna a hlan a. Mizoram sorkarin MADC tana hmalakna tha tak tak a neihte tarlangin Chief Minister hnenah lawmthu a sawi a ni.

Jubilee lawmna inkhawm hi MSO Vice President T John Tennyson in a kaihruai a, Rev K Vabeinocho chuan hunserh a hmang a, MSO President Elson Eliasah Notlia leh mi dangten thusawina hun an hmang ve bawk.

Mara Students Organization hi kum 1965 November ni 4 khan Shillong khawpuiah din a ni.