A thawh hnih nan Tlabungah 'I Kawtkaiah Sawrkar' buatsaih

Lunglei | Nov 4, 2025: Lunglei District Deputy Commissioner (Bawrhsap) Office bul tuma mipuite'n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, "I Kawtkaiah Sawrkar" (Prashasan Gaon Ki Ore) thawh hnihna chu vawiin khan Tlabung leh a chhehvel khaw mipuite tan Tlabung Civil Sub-Divisional Office Complex-ah buatsaih a ni.

Vawiina Tlabunga I Kawtkaiah Sawrkar hun buatsaihah hian office hrang hrang - Deputy Commissioner, SDO(C)/BDO Tlabung, Agriculture, AH & Veterinary, EF&CC (Forest), FCS&CA (Supply), Health & Family Welfare, Horticulture, ICDS, P&E, PHED leh UD&PA te'n stall hawngin, awlsam zawka mipuite dawr theih turin an inpho chhuak.

Aadhaar siam ṭhat/siam thar, MGNREGS job card siam ṭhat/siam thar, ration card siam ṭhat, income/tribal/residential certificate pek chhuah, sawrkar scheme hrang hranga inziah luh, mihring leh ran hriselna dinhmun endikna, mipui hriat tur pawimawh inzirtirna leh mipuiin harsatna an thlenna hun te buatsaih a ni a. He'ng service hrang hrang chhawp chhuahte hi mi 215-in an chhawr ṭangkai a ni.