Sakawrdai khaw mipui chungah Central YMA Executive Committee lawm; Sairang - Vairengte kawng chhia leh siam mek tlawh dawn!

Aizawl | Nov 4, 2025: kum 2025 - 2027 term atana Central YMA - Central Executive Committee thutkhawm hmasa ber chu nizan dar 7 khan Central YMA Committee Room-ah an thukhawm a, Member 69 an kal.

Meeting hi Central YMA President R Lalngheta'n a kaihruai a. CEC member thar te fuihna thu sawiin, "YMA hruai hna chu taimak chhuah ngai, teirei peih ngai anih avangin CEC member te pawh inpekna thuk tak nei turin” a chah.

Committee ah hian Sakawrdai a YMA Inkhawmpui lian hman zawh tak thlir letna hun hman a ni a. Inkhawmpui lian hlawhtling tak leh programme pawh tluang tak leh felfai taka hman a nih thu te; Inkhawmpui thlengtu Sakawrdai khua te in buatsaihna ṭhat dan te sawi lan a ni a, meeting chuan inkhawmpui thlengtu Sakawrdai khaw mipuite leh YMA member zawng zawngte chungah lawmthu a sawi.

Thurel zingah Meeting ah hian kum 2 chhunga Central YMA hnuaia Sub-Committee hrang hrang Member tur Aizawl khawpui chhung Branch tin atangin Member 3 zel lak khawm leh nise tih a ni a.

Mizoram châk lakna kawngpui Sairang - Vairengte inkar kawng chhia leh siam mek chu Nov 8, 2025 (Inrinni) ah a hmunah tlawh a, thil awmdan te thlithlai a, a ṭul anga hmalak zui nise tia rel ani.

November 12, 2025(Nilaini) -a Central Coordination Committee (CCC) meeting neih tur chungchang an thlir lawk bawk.

Heng bakah hian pawl inrelbawlna thil hrang hrang an rel bawk.