Indian Red Cross Society Mizoram-in half marathon buatsaih dawn

Aizawl | Nov 29, 2025: Indian Red Cross Society (IRCS), Mizoram State Branch Annual General meeting hmasa ber chu vawiin khan Larsap, General (Dr) Vijay Kumar Singh, PVSM, AVSM, YSM (Retd), President, IRCS Mizoram State Branch ni bawk hovin Durbar Hall, Raj Bhavan, Aizawlah neih a ni a. He hunah hian Larsap chuan IRCS Mizoram State Branch, I&PR leh ZMC&H te tangkawp buatsaih first aid tutorial video 6 te chu tangkai taka hman turin a tlangzarh a ni.

Larsap General (Dr) Vijay Kumar Singh chuan tunhnai hun reilote chhunga IRCS Mizoram State Branch hmalakna fakawm tiin, tun aia member tam zawk leh hmalakna tam zawk neih a nih theih nan Red Cross Society awmzia, kalphung leh hlawknate puanzar tam a tul thu a sawi a. Emergency huna che chhuak thei tura Mizo tawng ngeia inzirtirna first aid tutorial video 6 lai tlangzarh a ni chu lawmawm a tih thu sawiin, tangkai taka hmang turin mipuite a chah a. Member-te chu hmabak tam tak a la awm avangin infuih phur tawn thin tura chahin, hna kan thawh tam chauhin hriat kan hlawh dawn a, red cross society zawmtu pawh kan neih belh zel dawn a ni, a ti a. Meeting leh hunah hmasawnna nasa zawk hmuh theiha a awm ngei a beisei thu a sawi bawk.

Vawiin IRCS Mizoram State Branch Annual General meeting hmasa berah hian tun dinhmunah IRCS Mizoram State Branch hnuaiah life member 18 leh Aizawl khawpui chhung College pathum - Govt Aizawl College, Govt Aizawl North College leh Govt T Romana College - atangin Youth Red Cross Unit member 100 chuang hret an awm mek thu tarlan niin, member neih belh dan turte sawi ho a ni a. Aizawl District mai bakah district zawng zawngah Deputy Commissioner kaihhruai Red Cross Society din vek a nih theih nana hmalak nise tih niin, zau zawka tanlak a nih theih nan YMA leh NGO dangte nena thawhho dan ngaihtuah nise an ti a. Remchang hmasa berah Huhliap short stay-ah first aid training buatsaih nise tih niin, half marathon buatsaih tha an ti bawk a. Mipuite'n tun aia zau zawka Red Cross Society an hmelhriata an rawn tel ve zel theih nana pawimawhte chipchiar taka sawi ho a ni.

He hunah hian IRCS Mizoram State Branch Managing Committee Chairman Pu H. Lalengmawia chuan inlawmna thu sawiin, Secretary Dr. Chawnglungmuana'n April -October, 2025 chhunga an pawl hmalaknate a report a. Treasurer Pu Francis Lallawmkima hnen atangin finnancial report ngaihthlak niin, Public Relations & Communications OB in Charge Pu N. Vahneichhi hnen atangin First Aid Tutorial video chungchang report ngaihthlak a ni a. Larsap-in IRSC Mizoram State Branch Chairman Pu H. Lalengmawia, superannuation pension-a chhuak hnenah thlahna citation a hlan a. First aid tutorial video siamtu I&PR leh ZMC&H Director-te hnenah citation a hlan bakah life member thar 3 te kutah life membership certificate a hlan bawk a. Jt. Secretary Dr. Benjamin Lalrinpuia'n lawmthu sawiin meeting a khar a ni.