Green-Ag hnuaiah thlasik thlai chin dan zirtirna kalpui

Aizawl | Nov 29, 2025: Green-Ag hnuaiah thlasik thlai chin dan zirtirna neiin Farmer Field School hlawhtling taka neih a nih bakah Village Implementation Committee te nen an meeting a ni.

Green-Ag hnuaia hmalakna kal zelah khaw riat (8) Andermanik, Rajivenagar, Tuipuibari, Damparengpui, New West Phaileng, Kawnmawi, Lallen leh Phuldungsei ah thlasik thlai chin dan zirtirna hlawhtling taka neih a ni a, hemi rual hian Village Implementation Committee (VIC) meeting staff te nen inkawmho-na hun hman a ni.

He hun hmanpui tur hian Dr. Keny Vanlalhriatpuia, State Technical Coordinator Zothanpuii, FFS expert Esther Lalchhanchhuahi, Communication Officer Lalruatmawia Renthlei, District Support Officer, Mamit Community Resource Person Govin, Anil, Lalpiansanga, Abrahama leh Lalnunpuia te an tel bawk

Green-Ag hnuaiah hian kan tualto thlai chi hrang hrang te enkawl dan leh a chi sawngbawl dan te zirtirna pek an ni a. Damdawi emaw tur (poison) hmang lo a, ramhmul damdawi (organic) hmang a enkawl dan uluk taka pek an ni a. Lei tih that dan pawh he FFS ah hian zirtirna pek an ni bawk a ni.

VIC hi Green-Ag hnuaiah khaw tinah din a ni a, he VIC hian an khaw chhung hmalaktur plan siamin, Green-Ag kal tlanga hmalakna chu an vil chhunzawm zel ang a, an duh khawp lohna leh fel hlel pawh anmahni hian veng zel tur a duan a ni.

He VIC committee ah hi an khua Village Council President chu chairman niin, NGO hrang hrang, line department leh khaw chhunga tel awm mi te thlan chhuah niin, heng mite hian uluk takin ro an rel thin, anmahni khua bil harsatna, buaina an tawh te zirchiang a, chung an harsatna tawh hrang hrangte chu chinfel dan tur ngaihtuahin he project kal tlang a chinfel dan tur bawhzui tura chhawp chhuah thin a ni.

Hemi rual vek hian, Green-Ag hnuaia lo neitute hmasawnna tur tui chungchang hmalakna hrang hrang thlir ho a ni bawk, hei hi Natural Resource Management cum Irrigation tangkawp tura duan a ni.

Green-Ag hnuaiah hian kan ram ngaw humhalh a bikin Dampa Tiger Reserve leh Thorangtlang Wildlife Sanctuary chhe tur laka venhimna kawnga hmalakna pawimawh tak zingah lo neitu (farmer) ten thal lai pawha thlai an chin theihna turin Tanky lian tha tak siam a ni a.

He tanky hian thal lai pawha an thlai chin an enkawl theihna tur leh khawchhunga mi ten ram humhalh chhunga ei leh bar an zawnna tihreh a nih theihnan he hmalakna hi heng khuaah te hian kalpui mek a ni, chungte chu New West Phaileng, Teirei, Damparengpui leh Phuldungsei khuaah te hna hi zawh thawkhat tawh a ni

He tanky hian zau khat a thlai ching lo neitu chhungkaw 20 atanga 30 thleng chawm thei tura duan a ni a. He tanky siamna hi project kal tlanga siam a ni a, chutih rualin Rural Department atangin MGNREGS hnuaia ni 100 inhlawhna labour hi ni 10 zet mai convergence kal tlanga dawn a ni a. Village Implementation Committee kal tlangin Village Council kaih hruaina hnuaiah he tanky hi sak a ni.

Tunah hian tanky hi sak zawh a ni a, lo neituten an lo pawt kual theihna turin department dangte atangin pipe hi convergence kal tlang bawk a dawn leh beisei a ni bawk. Chutih rualin, he tanky huam chhungah hian MiSALT (changkham) te siam a, lei chunglang hang tha luangral tur venna te siam a, kan thlai leh thing, ching-it, thingthupui, Khanghu, phuihnam leh a dangte chin pawlh a, leilung venna tur te siam tum a ni bawk. Hemi rual hian thingkung chi hrang hrang (mutistoried plantation) hmang a ram bua leh chereu zel tur venna tur a hmalakna kalpui mek a ni bawk a ni.

"Nu mittuiin a fa nunna a chhan thei lo, i thisenin a chhan thei a sin,"

Thisen pe la, nun chhanhim rawh.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]