MZP Inter High School Quiz 2025-ah 'CLS Academy' an thiam ber!

Aizawl | Nov 29, 2025: Mizo Zirlai Pawl (MZP) General Headquarters, Aizawl buatsaih MZP Inter High School Quiz 2025 chu ni 28 November, 2025 (Zirtawpni) zan khan Ignite Studio-ah zawh fel a ni a. MZP Inter High School Quiz 2025-ah CLS Academy an thiam ber!

He inelnaah hian CLS Academy chuan lawmman Pakhatna la in pawisa fai cheng 30,000 bakah thuziak leh trophy an dawng a, Mt Carmel School chu pahnihna niin pawisa fai cheng 20,000 bakah trophy leh thuziak an dawng a, St. Lawrence School te chuan lawmman pathumna la in pawisa fai cheng 10,000 bakah Trophy leh thuziak an dawng bawk a ni.

Final-ah hian sikul pathum CLS Academy, Mt Carmel School leh St. Lawrence School ten inelna an hmachhawn a, MZP Inter High School Quiz 2025 Zirlai telte hi CLS Academy atangin Johny Lalruatfela S/o Kapmawia leh Esther Lalremruati D/o Dr. C. Vanneihthanga, Mt Carmel School atangin Vanmalsawma S/o C Vanlalliana leh HT Lalmuansangi D/o Lalngilneia, St Lawrence atangin Lalchhanhimi Khiangte D/o Vanlalzawna Khiangte leh Angela Lalhmingmawii D/o Hmingthanzauva te an ni.

MZP Inter High School Quiz hi kum 2010 atanga tan tawh niin, kumin hian sikul 23; CLS Academy, Kids Care School, Govt Mizo High School, St Joseph HSS, St Paul’s HSS, Govt Chaltlang High School, Neuhof English Medium School, Govt Bethlehem Vengthlang High School, Pine Mount HSS, Rosebud School, Shemford HSS, Solomon’s High School, Lengte Secondary School, Buhban Secondary School (RMSA), Govt Central High School, Rev Saiaithanga Memorial School, New Hope Academy, Olas Academy, Millennium English School, Christ Kngdom School, Mount Carmel School, Govt JL High School leh St Lawrence School te an ni.

He huna khuallian Minister of State B Lalchhanzova chuan, “Zirlaite chu tum mumal tak neia nasa leh zuala tumruhna tak tak nena lehkha zir turin a fuih a, harsatna leh retheihna karah pawh tih tak takna nena harsatnate hmachhawn thin tur leh tlawmlo turin a fuih a, zirna a hlawhtling tur hian eng harsatna mahin mi tumruhte a dang zo ngailo," a ti.

Khuallian chuan, Zirlaite leh Mizoram zirnain hma a sawn phan na tur a nih chuan tunlaia sawi hlawh tak MBSE Syllabus tih danglam thlenga hmalak a tum thu a sawi a, zirlai harsatna tawkte tana MZP thil tih ‘Students Aid Fund’ siam chu ropui a tih thu sawiin, MZP Students’ Aid Fund siam-ah pawh theih tawp a chhuah tur thu a sawi bawk a ni.

MZP President Dr C Lalremruata chuan, Zirlaite chu lehkhabu chhung chauh ni lova an zirlai piah lam thil te pawh chhiar a hre zau deuh deuh turin a fuih a, MZP in Students Aid Fund a siam chu zirlai harsate tana buatsaih a nih thu sawiin, sum harsatna avanga zirlai zir chhunzawm duh ngawih ngawih ten an zir zawm thei lo thin chu MZP chuan pawi a tiin, an harsatna te sukiang turin Students Aid Fund hmanga puihna pek an tum thu a sawi bawk.