CM-in Sairang - Thenzawl Rel kawng leh Pukzing - Silsury kawng leh Champhai - Tualpui kawng siamna tur chungchang thlen

Aizawl |November 24, 2025: Vawiin khan Delhi-a cham mek Chief Minister Lalduhoma leh Union Railway Minister Ashwini Vaishnaw,  te chu New Delhi-a Railway Bhawan-ah an inhmu a, inkawmna hun tha tak an nei.

An thil sawidun tlangpui chu a hnuaia mi ang hi a ni:

1. Sairang to Thenzawl Railway Extension chungchang:

Thenzawl Peace City Master Plan siam mek a nih avangin Sairang to Thenzawl Railway alignment chu peihfel vat a tul thu Chief Minister hian Railway Minister hi a hrilh a. Railway Minister hian February, 2026 ral hma ngeia peihfel an lo tum tur thu a sawi a ni.

2. ⁠Sairang to Guwahati Rel kal hun chungchang:

Sairang atanga Guwahati thleng rel kal mek chu passenger-te awlsam zawkna turin Guwahati hi zing dar 4:30 a thleng thla hman tura a kal hun siamrem Chief Minister hian a rawt a. Railway Minister rawtna hi a lo pawm a ni.

3. Sairang to Delhi Rajdhani Express chungchang:

Sairang to Delhi Rajdhani Express tuna tlan mek hian Delhi thleng thla turin darkar 42 leh minute 20 a mamawh a, hemi chungchangah hian Chief Minister chuan, kawng tawi zawk zawh tir turin rawtna a thlen a. Hei hi Railway Minister chuan lo pawmsakin, kawng tawi leh rang zawk zawhtir a nih tur thu a lo hrilh a, he kawng tharah hi chuan darkar 4 velin rel hi a thleng hma tawh dawn a ni.

Chief Minister hian Sairang to Delhi Rajdhani Express chu khualzin an tam avangin kar khata vawi hnih tal tlantir turin rawtna a thlen bawk a, hei hi Railway Minister chuan lo pawmin, bawhzui nghal a nih tur thu a hrilh a ni.

4. Kolkata to Sairang rel chungchang:

Kolkata to Sairang rel, Sairang Station-a zan dar 7:45 PM a thleng thin chu khualzinte tana awlsam zawk turin tlai dar 3:00 PM a thleng tura siamrem rawtna Chief Minister hian a thlen a. Railway Minister hian a lo pawm a ni.

5. Silchar - Bairabi to Sairang Rel Flag Off chungchang:

Chief Minister chuan Silchar to Bairabi khualzin phur rel, Sairang thlenga extend tur chu tlan tir (flag off) thuai turin a Railway Minister hi a ngen a, Railway Minister chu a hmun ngei atanga flag off turin a sawm nghal bawk a ni. Railway Minister chuan hun remchang a lo zawn tur thu a lo hrilh.

6. Mizoram ILP Portal awmsa IRCTC Train Ticket Portal a dahluh chungchang:

ILP tha taka kenkawh a nih theih nan leh hnam dang khualzinte awlsam zawk nan Mizoram ILP Portal chu IRCTC Train Ticket Portal-a dahluh ve ni se, ti a Chief Minister rawtna chu Railway Minister chuan IRCTC hotute a lo zirchian tir tur thu a lo hrilh a ni.

7. Warehouse/Cold Storage chungchang:

Adviser to Chief Minister hnen atanga Railway Station ramchhunga thlai thar thawnchhuah tur dah lailawkna tur Warehouse/Cold Storage din ni se, ti a rawtna chu Railway Minister chuan an lo bawhzui tur thu a sawi a. Mizoram Sawrkar chu Warehouse dinna tur hmun remchang lo ngaihtuah turin a ngen nghal a, thil tul dangte chu Raiway Ministry-in a ngaihtuah zui theih tur thu a hrilh a ni.

Chief Minister hi Dr KC Lalmalsawmzauva, Adviser to Chief Minister (Handholding Policy) leh Pi R Lalrodingi, OSD to Chief Minister ten a tawiawm a ni.

Vawiin vek khan Chief Minister Lalduhoma leh Pu Jyotiraditya Scindia, Union Minister, DoNER te chu Ministry of DoNER office, New Delhi-ah an inkawm.

Chief Minister chuan DoNER hnuaia Empowered Inter-Ministerial Committee thukhawmin ni 19 August, 2025 a a lo pawm tawh Pukzing - Silsury kawng leh Champhai - Tualpui kawng siamna tur bakah Mizoram chhunga Oil Palm Link Road siamna tur sum chu sanction thuai turin a ngen a. DoNER Minister chuan sum awmdan a zirin tun Financial Year-ah emaw Financial Year tharah pawisa hi sanction ngei an tum thu a lo hrilh a ni.

Chief Minister hi Pu Lalnghinglova Hmar, Minister, Pu KC Lalmalsawmzauva, Adviser to Chief Minister leh Pi R Lalrodingi, OSD to Chief Minister ten an tawiawm a ni.