HUN HARSAAH PAWH HLIMNA ZAWN

_Thlirna Thlak Danglam_

By Rick Warren 

— November 25, 2025

“Lalpaah chuan lawm fo rawh u: ka ti leh pek thin ang, lawm rawh u!” Philippi 4:4

Tirhkoh Paula chuan, “Lalpaah chuan lawm fo rawh u: ka ti leh pek thin ang, lawm rawh u!” (Philippi 4:4). Hun ṭhaah chauh lawm turin a ti lo che a. Lawm fo turin a ti zawk che a ni. Nimahsela engtin nge i hlim reng theih ang le?

Bible chuan heng palite hi i zawm chuan i hlim reng thei ang tiin min zirtir a ni:

*Engkimah Pathiana lawm.* I ṭawngṭai chuan lawmthusawi chungin ṭawngṭai rawg. Mi hrisel ber thinlung chu a lawm ṭhin. Chu chuan i taksa pawh a tichak a ni. Rilru hahna tur a do chak bik a, natna te pawh an nei tlem bik ṭhin a ni.

Lawmna nun neite chu an hlim reng a. Lawmna nun neilote chuan vanduai an inti a, engmahin a tih hlim theih loh avangin. Engamah an lungawi lo va. Engmah hi a ṭha tawk lo a ni.

Nimahsela engkimah lawmna thinlung i nei chho thei zel anih chuan i rilru hahna te pawh a kiang ve zel ang.

*Engahmah mangang suh.* Manganna hian engmah a thlak danglam thei lo. Kan rilru kan tihah thlawn mai mai ṭhin a ni.

Tumah hi mangang tura piang kan awm lo. Midang aṭanga kan zir chhawn mai a ni zawk. I ṭhiante aṭangin in zirchhuak a. I tawn hriat aṭangtein i zirchhuak ve bawk a ni. Chuvang chuan thu lawmawm tak a awm. I zirchhuah mai mai a nih chuan manganna chu neilo turin i zir leh thei a ni tih hi.

Engtinnge mangang lo turin i zir leh ang? Isuan Matthaia 6:34, “Chutichuan, atuk atan lungkham suh u, atuk chuan ama tan a lungkham chawp dawn si a. Ni khat atan ni khat hrehawm chu a tawk a ni.” Heihi vawng rawh: Ruah a sur hma chu i nihliap parh suh. Ni khat zel atan nung la hlim rawh.

*Engkimah ṭawngṭai rawh.* Mangan ai chuan i hun chu ṭawngṭai nan hmang rawh. I mangan tam tluk zeta i ṭawngṭai tam chuan, manganna pawh i nei tlem lehzual ang.

Pathian chuan i hriselnate, i fate, i lirthei ah te,  i  sum leh pai chungchang ah te a ngaihsak che i ring em? A ngaihsak tehreng mai che. Chuvang chuan, i harsatna zawng zawng Pathian hnenah thlen rawh.

*Ngaihtuahna dik pu ang che.* Rilru hahna hrang hrang i neih chuan i ngaihtuahna i thlak danglam a ngai tihna a ni. A chhan chu i ngaihtuahna chuan i rilru puthmang a hril tlat vang a ni. Bible chuan, i nun i thlak danglam duh anih chuan, i ngaihtuah dan pawh i thlak danglam a ngai a ti.

Chuvang chuan ngaihtuahna dik kan put a ngai a ni. Rilru dik tak pu a, Pathian Thu lam ngaihtuah chunga ngaihtuahna kan hman a ngai a ni.

Lawmthusawi te, manganna tihkian te, engkima ṭawngṭai te leh ngaihtuahna dik put te chu engnge a hlawkna le? Paulan, “Tichuan, Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u.” (Philippi 4:7).

Ngaihtuah zui atan

* Engnge i manganna chhan ni le? Pathian bia la, a hnenah i manganna chhan hrilh ang che.

* I mangan tam tluk zeta i ṭawngṭai tam chuan i nun chu engtinnge inthlak danglama i rin? Pathian hian a ngaihsak em em che a. I nunah i hriatthiam theih loh deuh thil a thleng anih pawhin Pathian hnenah lawmthu sawi tawp ang che. 

* Engnge i ngaihtuah nasat ber? Pathianin engnge i ngaihtuah atan a duh i rin? Chung thil pahnih chu a kalkawp em? A nihloh chuan, engnge a chhan?

Isua nen kawngdik zawh i duh em?

Isua hnenah i nun i hlan duh anih chuan, he ṭawngṭaina hmang hian ṭawngṭai ang che: “Lalpa, misual ka ni a, i ngaihdamna ka dil a che. Isua Krista hi fapa a ni tih ka ring a. Ka sualna avanga thi a ni tih leh i kai tho leh a ni tih pawh ka ring e. Vawiin aṭanga Lal leh chhandamtuah ka pawm a, a hnung zui turin ka inpe e. Ka nun hruai la, i duhzawng ti turin min pui ang che. Isua hmingin ka dil a che. Amen.”

A chung ami anga i ṭawngṭai thei anih chuan, emai ah hian min lo bia la Rick@PastorRick.com. Isua nena i zinkawng i zawhṭanna tur atana ṭangkai tur thil ka lo thawn dawn che a ni.

*[Lettu: Sangpuia]*