NIELIT Digital University (NDU) Platform leh NIELIT Centre thar hawng; hawn thar zingah NIELIT Centre Lunglei a tel

Aizawl | October 2, 2025: India Railway, Electronics & Information Technology leh Information & Broadcasting Minister Ashwini Vaishnaw chuan vawiin tlai dar 4:30 khan New Delhi-ah NIELIT Digital University (NDU) Platform thar a hawng a, hei hian India ramah zirtirna tha zawk mai bakah hmasawnna lian tak a thlen beisei a ni.

Hawnna inkhawm New Delhi a neih hi NIELIT Aizawl, Zuangtui leh NIELIT Extension Centre, Lunglei chuan Virtual Mode-in an zawm a. NIELIT Aizawl ah hian hemi pual inkhawm buatsaih niin, he hun hi Adviser to Chief Minister (Technical) Er. Ginzalala MLA chuan a hmanpui a, ani bakah hian, MZP General headquarters hruaitute, Zuangtui NGO leh Local Council te leh NIELIT Aizawl thawktu leh zirlaite an tel.

NIELIT Aizawl a hun hmannaah Chief Guest Er Ginzalala, MLA chuan kalkhawm te fuihna thu sawiin, midangte tan a malsawmna ni turin a chah a. Hmalam hun tuman kan hriat loh avangin, midangte tan an thiamna leh theihna te hmang turin a fuih.

NIELIT Director General Dr Madan Mohan Tripathi chuan NIELIT Digital University Platform sawifiahin, awlsam leh chipchiar zawk a NIELIT Deemed to be University-in zirna a kalpuina tur a nih thu a sawi a, tunah hian course 101 chhawpchhuah niin, la belh chhoh zel tur a nih thu a sawi a. He platform hi India rama a hmasa ber a nih thu a sawi rualin, khawvel pum atanga teh pawh a tha ber ala nih a beisei thu a sawi.

New Delhi a hawnna inkhawm tan hma hian NIELIT Extn. Centre Lunglei-in inkhawm a buatsaih, Govt. JB College, Lungleiah ‘Awareness on Cyber Security and Artificial Intelligence’ thupui hmangin zirtirna pek a ni a, Govt. JB College Principal Lalthangmawii Chhangte chuan Chief Guest niin a hmanpui. Scientist-D James K Lalthlamuana chuan inlawmna thu a sawi a. Awareness hi Session hnih a then niin Cyber Security thupui hmangin Senior Technical Officer Lalrempuia Sailo leh Artificial Intelligency thupui hmangin Scientist-D Vanlalhmangaiha Khiangte ten zirtirna an pe. Scientist-E F Lalrinawma'n lawmthu sawiin hun a khar.

Lunglei a NDU hawnna inkhawm Virtual Mode a zawmnaah hian T Lalhlimpuia, MLA chuan khuallian niin a hmanpui a, Lunglei Addl. SP K Beimataosa MPS chu khualzahawm a ni.

Union Minister-in a hawn tak NIELIT Digital University Platform hmang hian AI (Artificial Intelligence), Cyber Security, Data Science, leh Semiconductors-a tualchhung industry-te mamawh thiamna thar chherchhuah a tum a ni a. NIELIT centre thar panga, Muzaffarpur (Bihar), Balasore (Odisha), Tirupati (Andhra Pradesh), Daman (Dadra & Nagar Haveli and Daman & Diu) leh Lunglei (Mizoram)-ah te Union Minister hian a hawng nghal bawk a. Heng centre thar te hian digital education thiamna hmasawnna kawngah theih tawp an chhuah ang.

Hun lokal zel tur atan NIELIT hian Microsoft company leh company eng emaw zat nen Memorandum of Understanding (MoUs) an ziak a, hei hian a tak tak a hnathawh kawngah a puih beisei a ni.

NIELIT hi Ministry of Electronics leh Information Technology (MeitY) hnuaia scientific society pakhat a ni a, tunhnai khan Deemed to be University dinhmunah hlankai niin, Central University puitling a ni thuai tura ngaih a ni a. Zirlai tam tak a chherchhuak tawh a, eizawnna tam tak a siam sak tawh bawk a ni.