MZI leh Mizoram Tourism buatsaihin Nostalgia Nite hmang; "hmasawnnain a tih danglam theih loh chu Zai Rimawi ngainatna leh zin veivah nuam tihna hi a ni,"

Aizawl | October 8, 2025: Mizoram Tourism leh Mizo Zaimi Inzawmkhawm (MZI) buatsaihi zanin khan Aijal Club Park-ah Mizoram Travel Fest 2025 ‘Nostalgia Nite’ hman a ni a, Assembly Speaker Lalbiakzama'n khuallian niin a hmanpui.

Speaker chuan, "Tunlai thiamna leh remchanna mil hian kan hranghlui te pawh insiamremin intuaithar zel ula," a ti a, "Tunlaiah zaithiam hrang hrang leh zai dan hrang hrangte, an rawn chhuak thar zel a. Kan hranghluite hian hlu ta lo riau ten in lo in hria ang tih hi ka hlau thin. Nangni vanga tun dinhmun hi rawn chuangkai thei an ni a, in kawng sah en sa rawn zawh an ni. Kan ram tana in hlut zia hi hre nawn fo turin ka duh che u a ni," a ti bawk.

Speaker Lalbiakzama chuan, "Khawvelin hma a sawn a, AI (Artificial Intelligence) te, Machine Learning (ML) te leh a dang ten chak taka hma sawnin kan thalaite nun phung pawh nasa tak in a sawi danglam chho mek a. Heng hmasawnnain a tih danglam theih loh chu Zai Rimawi ngainatna leh zin veivah nuam tihna hi a ni," a ti.

Zanin 'Nostalgia Nite'-ah hian MZI member zaithiam hranghlui - H Zosangliani, Lalsawmliana, Marina Sailothangi, Mazami Chhakchhuak, Lalchamliana Sailo, Lalbiakchhungi Pachuau, Lalruatpuii leh H Zarzoliana te'n mipui kalkhawmte an awi a ni.

Speaker thusawi kimchang: https://www.exploremizoram.com/2025/10/mizoram-travel-fest-2025-nostalgia-nite-speaker-lalbiakzama-thusawi.html