Mizoram Travel Fest 2025 ‘Nostalgia Nite'-a Speaker Lalbiakzama thusawi

Thusawi: Pu Lalbiakzama, Hon’ble Speaker,

@ ‘Nostalgia Nite’, Mizoram Travel Fest

@ Aijal Club, Aizawl (October 8, 2025)

Jointly organised by Tourism Department & MZI.

A hmasain kan Minister te, ka MLA puite, Tourism Department lama kan hotute, MZI hruaitute, leh Zanina lo kal khawm zawng zawngte, leh a bik takin, kan hranghlui zaithiamte chibai ka buk a che u.

Zanin hi hun hlu tak a ni in ka hria. Kan hranghlui zaithiam tak tak, in zai ka lo ngaihthlak fo te hun kan han hmang ho thei hi a mimal tak pawhin vannei ka inti hle. Zaithiam chu ka ni lo na in music hi ka lungkham te zinga pakhat a ni ve a. Ziaktu ropui tak pakhat, Hans Christian Anderdersen-a Chuan, “Thu tluangtlamin a sawi fiah phak loh hi, hla ah erawh a chiang thin” a lo ti a ni.

Tunlaiah zaithiam hrang hrang leh zai dan hrang hrangte, an rawn chhuak thar zel a. Kan hranghluite hian hlu ta lo riau ten in lo in hria ang tih hi ka hlau thin. Nangni vanga tun dinhmun hi rawn chuangkai thei an ni a, in kawng sah en sa rawn zawh an ni. Kan ram tana in hlut zia hi hre nawn fo turin ka duh che u a ni.

Kan ram hi, in kalpawhna chi thum (3): Lamlian (Road), Rel (Train) leh Boruak (Air) ten mumal takin a pawh ve ta a. Tuikawng (water way) hman tangkai lam ah pawh hmalak mek zel a ni a, chhawr theih hun a la awm ve thuai turah beisei i la.

Rel rawn luh hlim khualzin tam hunlai tak a Tourism Department ten khualzin hip na tur a inchaw be tak mai in han buatsaih hi a changtu Minister leh Department Official te in fakawm hle mai. Tin, kan hnam zia pholang tu ber pakhat, kan zaithiam te nen thawhho nachang in hria hi MZI leh Tourism Department ka fak nawn duh che u a ni.

Khawvel in hma a sawn a, AI (Artificial Intelligence) te, Machine Learning (ML) te leh a dang ten chak taka hma sawn in kan thalaite nun phung pawh nasa tak in a sawi danglam chho mek a. Heng hmasawnnain a tih danglam theih loh chu Zai Rimawi ngainatna leh zin veivah nuam tihna hi a ni. Tunah hian kan ram hian hmasawnna tura remchanna (opportunity) tha tak a nei a, i hmang tangkai deuh deuh ang u. Kan official-te pawh tun ai nasa a tan la turin kan chah duh che u a ni.

Kan ram hmasawnna vang in, zai lamah Business Opportunity nasa takin a inhawng chho dawn ni in a lang. Tunlai thiamna leh remchanna mil hian kan hranghlui te pawh insiamremin intuaithar zel ula. Hnamdang hla te zir thar zel teh u, English leh Hindi chang ni lo a, khualzinte dawngsawng tur chuan International Tourist bakah Local tourist thleng a hip turin , North East state dang tawngte leh India Ram State hrang hrang hla te, Chinese, French, Latin te nen lam in zir hi a tul chho dawn ni ten a lang, chutiang chuan khualzinte awm theihna turin Hotel, Restaurant leh Café-ah te pawh hunbi nei a zai a inhlawhna hun remchang tha tak a inhawng chho zel dawn a ni. Chutiang tur chuan hranghlui te intuaithar zel turin ka chah duh che u a ni.

Kohhran khaipa, Saint Augustine-a chuan, “Khawvel hi lehkhabu ang a ni a, khawvel hmun dang daidar lo te chuan lehkha phek khat chiah an chhiar a ni” a lo ti a. Kan rama khualzinte hip kan tum lai hian ram dang ten an rama khualzinte hip lut turin tan an lak dan lakchhawn tur tha awm apiangte zirchiangin hmang ve ila. He Nostalgia Nite atang hian Zaimite hmanga khualzin hipna bung thar intan rawh se.

Ka lawm e.