Mizoram-ah Football player zawnga mi bum ching, coach nia inchhal pahnih an awm!

"Hun tiam chhunga naupangin an pawisa sen tawh kim takin an hmu let lo a nih chuan a tul anga hma lak zui zel a ni ang," ~ Greenfield FA & Lushai Corner FA

Aizawl | Oct 1, 2025: Mizoram-ah Football player zawnga mi bum, coach nia inchhal pahnih an awm nia hriat a ni. Mizoram Footbal-a thleng atana thleng atana duhawm lo tak mai thlengin, P Lalmawizuala s/o P Rohnuna, ITI Veng leh Lalchhuankima Lalrinawma, ITI Veng te chuan, Greenfield FA leh Lushai Corner FA te hming hawhin football player an lo zawng a, mi an lo bum niin Greenfield FA leh Lushai Corner FA chuan khan thuchhuah siamin an tarlang.

AI generated Image

HLIAPPUI LEH MIMBUNG UNDER 17 TRIAL CHUNGCHANG SAWIFIAHNA

Aizawl | 01 October, 2025

Ni 19 September, 2025 (zirtawpni) khan P Lalmawizuala s/o P Rohnuna, ITI Veng leh Lalchhuankima Lalrinawma, ITI Veng te chu Hliappuiah kalin Greenfield Football Academy thuneitute hriatpuina telloin Greenfield Football Academy Under 17 player tur zawngin Trial an nei a. Hetah hian Players pahnih(2) an thlang chhuak. An players thlan chhuah te atang hian Hostel / Admission fee turin X8,000 (cheng sangriat) an dil a. Player Pakhat hian cheng 8,000(cheng sang riat) chu a lo pe hman a. Hliappui GSA hruaitute'n he thu hi an hriatin fimkhur turin an rawn a. Player pakhat zawk hian pawisa hi a pe ve hman ve ta lo hlauh a ni.

Lalchhuankima s/o Lalrinawma, ITI Veng hian Lushai Corner Football Academy (LCFA) Under 17 player tur Trial kal tlanga zawn mek anih thu a lo hria a. LCFA Coach te a rawn bia a. Player tha a neih nual thu sawiin, Trial a rawn dil a. Hetih lai hian LCFA chuan U-17 player tur a lak fel thawkhat tawh avangin Trial a theih tawh loh thu lo hrilh a ni. A rawn ngen luih zel hnuah, "mahni insengsoa rawn Trial tur an nih chuan kan lo pawm leh hram ang" tiin LCFA coach te'n an lo chhang ta a ni.

Tichuan, Ni 20 leh 21 September, 2025 ah Lalchhuankima s/o Lalrinawma, ITI Veng chu a thurualpui mi thenkhatte nen Mimbungah LCFA Coach anga insawiin, U-17 Trial an ko a. Mimbung, Teikhang leh Hrianghmun atang te a Players pasarih(7) thlang chhuakin, Hostel fee thla khat atan X5,000 (cheng sangnga) theuh a lak sak a. Hostel thla khat fee bak hi chu sum sen ngai a awm tawh dawn lo nia a hrilh bakah, Aizawl panna senso te, Hotel thlenna te, taxi fare etc. zawng zawng pawh LCFA atanga an hmuh let leh vek tur thu a hrilh a ni. Mimbung Trial-a a players thlan chhuah mi pasarih (7) te chu Aizawlah a rawn hruai thla a. LCFA hming leh LCFA-in bill a pek turin Guest House-ah a lo thlen pui a. Guest House-a an thlen chhung hian chaw mumal pawh ei loin a lo awm tir a ni.

Ni 23 leh 24 September, 2025 zinga Trial tura a rawn hruai te atangin LCFA U-17 Players tur mi pali (4) lo thlan chhuah an ni a, U-17 Camp zawm nghal tura hrilh an ni. A tling ve lo mi pathum (3) te hi an duh a nih chuan LCFA-ah Free Admission an tih theih tur thu lo hrilh an ni bawk. Heng players 7 te hi tling vek tawh a inngaia rawn chhuk thla an nih avang te, Hostel Fee Rs 5,000 (cheng sangnga) pe sa a lo kal an nih avang te chuan thil fel tawk lo a awm tih an hrethiam ta a. Players thlan chhuah te pawhin haw mai an duh thu an sawi takah chuan, thil awmzia zawh chhuah an ni a. An nu leh pa te biak pawh an nih hnuin keini lam chuan thil diklo a awm tih kan hre chhuak ve to chauh a ni. LCFA in players pali(4) thlan chhuah tak te zinga pahnih (2) te phei hi chu kum over tawh anni tih hre reng chungin Lalchhuankima hian rawn hruai thla luiin MFA U-17 league khel thei turin a buaipui thei dawn niin a lo sawi bawk.

P Lalmawizuala P Rohnuna, ITI Veng leh Lalchhuankima s/o Lalrinawma, ITI Veng te hi Greenfield Football Academy leh Lushai Corner Football Academy te hian an thil oh hi kan hriatpui lo a, Football kaihhnawih leh thil dangah pawh inzawmna kan la nei ngai lo a ni. Hetiang thil duhawm lo tak a thleng hi pawi kan ti hle a ni. Mizoram Football kal zelna atan thil pawi tak thlen theitu a ni a. A thlen nawn tawh loh nan Mizoram District hrang hrang FA-te leh Mizoram mipui te'n zirchiang hmasa a fimkhur turin kan inngen a ni e.

He thil duhawmlo tak thleng chungchanga theihtawp chhuah a min puitu - Saitual District FA hruaitute chungah te, Mimbung leh Hliappui GSA hruaitute, 1st Battalion MAP, Armed Veng leh Aizawl Police Station-a thawktute chungah lawmthu kan sawi a ni.

Keini - Greenfield Football Academy leh Lushai Corner Football Academy te hian Naupangin an pawisa lo sen tawh kim takin hmu let leh se oh hi kan duh ber a ni a. Tun dinhmunah hian eng emaw chen hmuh let a ni tawh a. An hmuh let kim hun kan nghak mek a ni. Hun tiam chhunga an hmu let lo a nih chuan a tul anga hma lak zui zel a ni ang.

(B MALSAWMZUALA)

Head of Youth Development,

Lushai Corner FA

(ZOMUANA ZAHAU)

Director,

Greenfield FA