CM-in Lawngtlai leiminna hmun tlawh

Lawngtlai | October 1, 2025: Vawiin tlai khan Kumin May ni 30 zana Lawngtlai Bazar Veng leh Chandmary Venga leiminna hmun chu Chief Minister Lalduhoma'n a hmunah enin, hmalak zui dantur thlirna a nei.

Chief Minister hi Lawngtlai DC Donny Lalruatsanga'n Leiminna laiah lo dawngsawngin, Adviser to Chief Minister Dr Lorrain Lalpekliana Chinzah leh Lawngtlai Bawrhsap Donny Lalruatsanga ten chhiatna thlendan kimchang Chief Minister hi an hrilh a. Chhiatna thlengah Sawrkar leh Tlawmngai Pawl te tanrualna thatzia te, chhanchhuah leh chhawmdawlna pawh theihtawp chhuaha neih a nih thu bakah sawrkar anga tihtheih ang ang tanpuina leh chhawmdawlna lam hawi pawh buaipui a nih thute Chief Minister hi an lo hrilh a ni.

Chief Minister Lalduhoma chuan chhiat tawkte a tawrhpui thu a sawia, chhiatna vanga In leh bungrua chhiate hlut zawng mumal taka chhutchhuaka, a ranglama report siam a, Central lamah thehlutin, amah pawn a bawhzuinaah theihtawp a lo chhuahtur thu a sawi. In chim senghawi kim loh pawh a theih anga senghawi dan ngaihtuah tha a tih thu Chief Minister hian a sawilang tel bawk.

Kumin May ni 30 zana Bazar Veng leh Chandmary Venga leimin vang khan Inrellai pahnih telin RCC Building paruk leh Assam Type pakhat a chhia a ni.