Minister Prof. Lalnilawm’n W Phaileng RD Block Golden Jubilee lawmna leh BDO Office sak thar hawng

Mamit | October 1, 2025: Vawiin khan Rural Development & Administration Minister Prof.Lalnilawma chuan West Phaileng Rural Developemnt Golden Jubillee hmanpuiin BDO office sak thar chu a hawng nghal.

Prof.Lalnilawma chuan RD&A Dept a lo thawk tawh zawng zawng a bikin, West Phaileng RD Block Office tana rim taka thawktute, mipui tana an inpekna avang leh Pathian hruainaa West Phaileng RD Block in Golden Jubilee a thleng leh Office thar tha tak an nei ta chu a lawmpui thu a sawi a, Golden Jubillee hial kan lo thlen takah hian thawktute chu mipui tana thawk kan nih angin, hna thawk tha tawk kan inti em tih chu mahni inzawt turin a chah a. Rural Development-a thawk kan nih chuan thingtlang lama chengte tana thawk kan ni tih inhria a, mahni ke a ding thei tura chherchhuah tum tur leh self help group te'n an thil siamte rampawna thawnchhuah a nih theihna turin Sawrkar pawhin theihtawp a chhuah thu a sawi bawk.

RD Minister chuan Rural Department hi mirethei leh harsa zawk tana ding a nih angin, insak tanpuina lokal thin pawh a dawng tur dik takin an dawng tur a ni a, party mi leh sa induhsakna chi a ni lo a,tanpuina hmu tur takin an hmuh chuan khua/veng in hma kan sawn phah chu Sawrkar duh dan a ni a ti. Sawrkar chuan Kuthnathawtute a ngaipawimawh a, an ei zawnna feh kawng tha zawk a cheibawl sak turin ruahmanna a siam mek a ni a ti bawk.

Pu Moses Ramdinthara, BDO, West Phaileng chuan kalkhawmte lawmna thu a sawi a, Golden Jubillee lawmna leh Office thar hawn Pathian hnena hlanna Pastor Malsawmsangzuala, PCI West Phaileng Pastor Bial chuan a nei a. W. Phaileng, RB Block-a BDO lo ni tawh te'n thusawina hun an hmang bawk

Vawiin Golden Jubillee lawmna leh Office Building thar hawnnaah hian Minister hi Pu.K.Laltlawmlova District Bawrhsap Mamit, Pu. Lalvenhima Deputy Secretary RD&A, Pu. Vanlalrova Jt. Director RD&A, Pu.Malsawmzuala Project Director Mamit  leh Rural Development & Administration leh Officials dang te'n an tawiawm a ni.

W.Phaileng BDO office sak thar hi Floor 4 a sak niin MGNREGA material component sum atangin cheng nuai 211.11 senga sak a ni.November, 2023 ah sak tan niin, April, 2025 khan sak zawh a ni. Building lenzawng hi 175 sqm a ni. W. Phaileng RD Block hi kum 1974 ah hawn a ni a, BDO 29 te'n thutchilh tawhin, tunah hian thawktu 40 an awm mek a ni.