New Delhi | October 7, 2025: New Delhi-a India Mobile Congress (IMC) 2025-a tel tura thang mek Information & Communication Technology Minister Dr Vanlalthlana chuan vawiin khan Union Minister of Electronics and Information Technology Pu Ashwini Vaishnaw chu a pisa-ah a kawm.
ICT Minister Dr Vanlalthlana chuan Mizorama Software Technology Park of India (STPI) changtlung zawka din vat a nih theih nan MeITY Minister chu hma lakpui turin a ngen a. Mizoramin human resource an neih ṭhat thu leh digital literacy-a an sanna chu ṭangkai zawka hman a nih theih dan tur a sawipui a. Rei lo tea Mizoram Engineering College (MEC)-a class ṭan tura Mizoram Sawrkar hmalakna leh National Institute of Technology (NIT) Mizoram campus, Lengpuia din tur pawh hun rei tak chhunga chawlh a nih hnuah hna thawh chhunzawm leh thuai a nih tur thu a sawi lang a. Mizorama IT hub din a nih theih nan leh software export leh IT incubation centre kalpui a nih theih nan STPI changtlung tak chu Mizoram mamawh a nih thu Union Minister of Electronics and Information Technology chu a hrilh bawk.
Mizorama STPI centre neih mek chuan Ch. Chhunga Bus Terminal Building, Ṭhuampuia mi luahin kum 2018 aṭanga din ṭan a ni a. Centre of Entreprenuership (CoE) kalpuiin gaming leh entertainment bikah bul ṭan tirte hma a lakpui ṭhin a ni. STPI hi India rama IT a ṭhan zel nana din niin India ramah a inzarh pharh mek a, State leh UT zawng zawngah din kim a la ni lo.
STPI din dan tur mumal zawk leh changtlung taka din a nih theih nan ICT Minister Dr Vanlalthlana chuan Sawrkar Laipui Ministry hi a dawr a. MeITY Minister chuan Mizorama hmunhma awmte a hmuna an en vat tur thu lo hrilhin a rang hma lakpui theih ngei a beisei thu a sawi.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ



Post a Comment
He post chungchanga i ngaihdan lo sawi ve rawh: