"Sorkar Ukil te hi sorkar tana inhlawha court-a ding thin in ni satliah lo va, dikna vawnghimtu, mipui sorkara mipui aw, mipui leh sorkar chanvo vengtu leh haichhuah saktu in ni,"

Aizawl | October 7, 2025: Chief Minister Lalduhoma chuan vawiin khan a department enkawl Law & Judicial buatsaih Training for Government Advocates/Public Prosecutors & Nodal Officers of Court Cases, I&PR Auditorium-a buatsaih chu a hawng.

CM Lalduhoma chuan, "Sorkar Ukil te hi sorkar tana inhlawha court-a ding thin in ni satliah lo va, dikna vawnghimtu, mipui sorkara mipui aw, mipui leh sorkar chanvo vengtu leh haichhuah saktu in ni," a ti a. "Court-a sorkar aw (voice) in nih avangin mi dik lote hmaa tlawm duh ngai lo nun hi nangmahni kaihruaitu ni ngei se ka duh hle," a ti bawk.

Law & Judicial Secretary TL Guite pawhin thusawiin, hetiang training hi tun hma khan kan nei thin a. Hun engemaw chen kha kan chhunzawm thei ta lo va. Kuminah a bul kan han tan thar leh ta a ni. District hrang hrang atanga lo kal khawm sorkar ukil te leh Court case awmna department-a Nodal Officer te an tel a, vawiinah chipchiar takin training an nei dawn a ni, a ti.

A hawnna inkhawm hi Law & Judicial Addl. Secy R Zahmingthanga chuan a kaihruai a, Melody Lalrochampuii chuan lawmthu sawiin a khar a. Training neih zui nghal a ni.

Chief Minister thusawi tlangpuite:

1. Sorkar Ukil te hi sorkar tana inhlawha court-a ding thin in ni satliah lo va, dikna vawnghimtu, mipui sorkara mipui aw, mipui leh sorkar chanvo vengtu leh haichhuah saktu in ni. Court-a sorkar aw (voice) in nih avangin mi dik lote hmaa tlawm duh ngai lo nun hi nangmahni kaihruaitu ni ngei se ka duh hle.

2. Sorkar ukil kan ni emaw, private ukil kan ni emaw, ukil tha chu a achievement atanga teh a ni tih hretu vek kan ni a. Uluk takin kan thlir reng che u a ni.

3. Mi tam tak chu thahnemngai takin in thawk tih kan hria a, heng mite chungah hian kan lawm thin hle. Amaherawh chu, kan chak ngei ngeina tur nia kan ngaih case thenkhatah delay a awm vanga sorkar tanhmun a chhiat phahna a thleng zauh zauh thung. He mi kawngah hian kan fimkhur a tul a ni.

4. Law & Judicial department-in Office Memorandum on “Procedure for Handling Litigation and Matters Connected therewith” an tihchhuahah kha tha taka kan zawm tlan a ngai.

5. Tuna Central Criminal Law thar pathum leh Inter operable Criminal Justice System (ICJS) tha taka kalpui a nih theih nan Directorate of Prosecution din turin chak takin hma kan la mek a. Study group-te dinin an recommendation pawh sorkarah an rawn thehlut tawh a ni. Cabinet-a chhawpchhuah tura hmalak mek a ni.

6. Nodal Officer-ten department tan legal matters-ah mawhphurtu pawimawh in ni tih in inhriat thar a thain ka hria. Sorkar ukilte thlunzawmtu ber in ni a, thu haw lam leh kal lam vawngtu in ni. Sorkar ukilte nena in inkarah communication tha tak neih a tul a. Case hmanhmawhthlak leh nghawng pawi zawk nei theiah te phei chuan lehkha hmanga indawr mai duh tawk lovin, phone tein sawi tlang ula, a tul phei chuan meeting-te neiin sawi ho thin ula a tha ka ti. Communication tha lo leh case ngaihthah avanga sorkarin harsatna kan tawh ang chi hi chu thleng nawn tawh lo se kan duh.

7. He training hian kan hriatna chauh tipung lovin ram tana kan inpekna pawh tipung se, dikna tundin hi Law Professional kan nih chhan leh kan hnain a tum ber a ni tih a tharin i hre nawn ang u, tih te an ni.