MCC chungchangah CM leh a adviser laka hmala tura ngenna thehlut!

Aizawl | Oct 24, 2025: Chief Minister Lalduhoma leh Adviser to CM Dr. Lorrain Lalpekliana Chinzah, MLA lakah Election Model Code of Conduct bawhchhiat chungchangah hmala tura ngenna Joint Chief Electoral Officer (Joint CEO) Mizoram hnenah an thehlut.

He ngenna hi Advocate Zothansangi Hmar hmingin thehluh a ni a, vawiin chawhma dar 11:30 khan Jt. CEO Ethel Rothangpuii hnenah an thehlut a ni. 

Dated: 24th October, 2025 Place Aizawl

To, 

The Joint Chief Electoral Officer

Government of Mizoram,

Mizoram, Aizawl.

 

Subject: Model Code of Conduct bawhchhiat chungchanga hma la tur a ngenna.

Ka pi, 

I hnena ka thu lo thlen hi ngun taka min ngaihtuah sak a, a tul anga hma min laksak nghal turin ka ngen a che.

Vanduaithlak taka Dampa Constituency MLA nilai Pu Lalrintluanga Sailo chu dt 21.7.2025-ah alo boral tak avangin a hmun ruak hnawh khahna tur atana inthlan (By- Election) chu Election Commission of India chuan dt 6.10.2025 ah puangin inthlan ni atan dt 11.11.2025-chu a ruat a ni.

A chunga tarlan ang khian inthlan puan ni ni 6.10.2025 atangin Model Code of Conduct hman nghal a nih laiin, kan Chief Minister zahawm tak Pu Lalduhoma leh Pu Dr. Lorrain Lalpekliana Chinzah MLA & Adviser to Chief Minister te chuan Dampa Constituency huam chhungah Model Code of Conduct-in tih tur leh tih loh tur a sawite pawh pawisa lovin an Party Candidate tana mipui vote hmuh sak theihna tur ang lam hawi zawngin an campaign a, hei hi MCC bawhchhiatna lian tak niin a lang a, MCC an bawhchhiat dan chu hetiang hi a ni:

 

1. Pu Lalduhoma, Chief Minister: 

Ani hian ni 20.10.2025 khan Reiek khuaaah an party ZPM tana Dampa East Block Bye - Election Campaign kick off programme neiin, Reiek mipuite hnena an thlai thar sawngbawlna kawnga hmasawnna itawm tak tur anga ngaih theih tur ruahmanna thar lam thawhsak an nih tur thu leh hmasawnna tam tak bial mipuiten an dawng dawn tih sawiin, he a thusawi hi video clip viral pawh hmuh tur tam tak a awm nghe nghe a, tin, Social Media-ah ziaka post chhawng tam tak pawh a awm a ni.

 Tin, New West Phailengah West Block lam Campaign Kick off chu ni 21.10.2025 khan nei lehin hetah pawh hian Tui chungchangah pawh Cheng Vaibelchhe 770 man zet Reiek hmunah tuikhuah siama, a chhehvel khaw 14 chawm tel thei tur a nih dawn thute, fur laia Tlawng tui Pump a theih loh laia Aizawl khawpui pawh chawmtu tur a nih nghal tur thute pawh a sawi a. Hetianga mipuite hnena a thusawi hi MCC bawhchhiatna chiang tak a ni.

 

2. Dr. Lorrain Lalpekliana Chinzah, MLA, Adviser to Chief Minister: 

Ani hian Ni 17.10.2025 khan Dampa Constituency huam chhung khaw thenkhat Parvatui leh Phulpui West khuaah "Free Health Clinic" buatsaihin a thlawnin damdawi te pawh a sem thu leh mipuiin an hluta an chhawr tangkai thute, ZPM Hqrts Joint Secretary R. Vanlalchhuanawma, Lai Autonomous District Council (LADC) MDC Lallawmsanga Apetow, leh Tlangnuam Local Council Vice-Chairman, PC Muana ten an tawiawm thute tarlangin ama Facebook-ah post a siam chu Online magazine pakhat Explore Mizoram pawhin October 18, 2025 ah hemi thu tho hi an tarlang a ni.

Hetianga MLA nilai leh Adviser to CM ni bawk Dr. Lorrain Lalpekliana Chinzah hmalak dan pawh hi an party leh Party Candidate chu miin an vote theihna tur atana Voter-te hneh tumna Campaign-na kawng khat a ni tih a chiang hle bawk.

MCC an bawhchhiatna te chu a hnuaiah hian kan han tarlang nghal e: Chapter II (i) Sum leh pai hmanga voter-te thlem

Chapter VIII (3) Minister, Member of Parliament, Member of Legislative Assembly, CEM, Councillors, thu neitu dang leh Political mi leh sa reng rengin sum hmanga tanpuina emaw hmasawnna lam thil an pe chhuak tur a ni lo.

(13) Ruahmanna thar lam hawi reng reng puan chhuah rih loh tur a ni.

Democracy rama kan tum ber pakhat inthlanna felfai leh thianghlim tak neih te, chumi a thlen theihna tura rim taka hma lak a nih lai mek a, kan ram hruaitu lu ber leh a adviser-in nakin zel atan pawh chhunzawm tlak loh tur dan bawhchhiatna min hnutchhiaha, MCC pawisakna nei miah loa an chet dante hi a tha lo tak zet a ni. Chuvangin, Pu Lalduhoma kan Chief Minister leh Dr. Lorrain Lalpekliana Chinzah, MLA & Adviser to CM te chungah hian dan angin hremna pe turin ka ngen a che. 

I rintlak, 

(ZOTHANSANGI HMAR)

Advocate,

College Veng, Aizawl. 

Enclosed:

1. Explore Mizoram online thuchhuah dated October 18, 2025 print chhuah.

2. Pu Lalduhoma'n Reiek-a thu a sawi lai screenshot print chhuah. 

3. Pu Lalduhoma'n New West Phaileng-a thu a sawi lai screenshot print chhuah.